କରୋନା ମୁକାବିଲା ଲାଗି ଜିଲ୍ଲା ବିପର୍ଯ୍ୟୟ ପରିଚାଳନା ସଂସ୍ଥା (ଡିଡିଏମ୍ଏ)ର ସହାୟତା ନେବା ଲାଗି ଜାତୀୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ (ଏନ୍ଡିଏମ୍ଏ) ରାଜ୍ୟ ସରକାରଙ୍କୁ ପରାମର୍ଶ ଦେଇଛନ୍ତି । ଏହାଦ୍ୱାରା କରୋନା ଭୂତାଣୁ ବ୍ୟାପିବାକୁ ରୋକାଯାଇ ପାରିବ ବୋଲି କୁହାଯାଇଛି ।
ଏନ୍ଡିଏମ୍ଏର ସଦସ୍ୟ ସଚିବ ଜି.ଭି.ଭି ଶର୍ମା ରାଜ୍ୟ ସରକାରଙ୍କୁ ଏଭଳି ଉପଦେଶ ଦେବା ସହିତ ସମଗ୍ର ବିଶ୍ୱରେ କରୋନା ଆକ୍ରାନ୍ତଙ୍କ ସଂଖ୍ୟା ୯୦ ହଜାର ଅତିକ୍ରମ କରିଥିବା ବେଳେ ରାଜ୍ୟରେ ଯେଭଳି ନ ବ୍ୟାପେ ସେଥିପାଇଁ ପଦକ୍ଷେପ ନେବାକୁ କହିଛନ୍ତି । ଶ୍ରୀ ଶର୍ମା ଅନୁଭବ କରିଛନ୍ତି ଯେ ରାଜ୍ୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ (ଏସ୍ଡିଏମ୍ଏ) ଏବଂ ଡିଡିଏମ୍ଏ ପରସ୍ପରକୁ ବିଶ୍ୱାସକୁ ନେଇ ସମନ୍ୱୟ ରକ୍ଷା କଲେ କରୋନା ଭଳି ବିପର୍ଯ୍ୟୟ ମୁକାବିଲା କରିପାରିବେ । ବିଭିନ୍ନ ଏନ୍ଜିଓ ଏବଂ ସିଭିଲ୍ ସୋସାଇଟି ସହିତ ସମ୍ପର୍କ ରକ୍ଷା କରି କରୋନା ମୁକାବିଲା ସଂକ୍ରାନ୍ତରେ ଲୋକଙ୍କୁ ସଚେତନ କରିବା କ୍ଷେତ୍ରରେ ଡିଡିଏମ୍ଏ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରିବ ।
କେନ୍ଦ୍ର କ୍ୟାବିନେଟ୍ ସଚିବ ନିୟମିତ ଭାବେ କରୋନା ସଂକ୍ରାନ୍ତରେ ସମୀକ୍ଷା କରୁଥିବା ବେଳେ କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରାଳୟ ପକ୍ଷରୁ କରୋନା ମୁକାବିଲା ନେଇ ମାର୍ଗଦର୍ଶିକା ଜାରି ହୋଇଛି । ଏହାକୁ ରୋକିବା କ୍ଷେତ୍ରରେ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷଗୁଡ଼ିକୁ ଗୁରୁତ୍ୱପୂର୍ଣ୍ଣ ଭୂମିକା ତୁଲାଇ ପାରିବେ ବୋଲି କେନ୍ଦ୍ର କ୍ୟାବିନେଟ୍ ସଚିବ କହିଥିବା ଜଣାଯାଇଛି ।
ଡିଡିଏମ୍ଏମାନେ ଏନ୍ଜିଓ ଓ ସାମାଜିକ ସଙ୍ଗଠନଗୁଡ଼ିକ ସହିତ ସମନ୍ୱୟ ରକ୍ଷା କରି ବିଭିନ୍ନ ଗୋଷ୍ଠୀକୁ ସଚେତନତା କାର୍ଯ୍ୟକ୍ରମରେ ସାମିଲ ଲାଗି କୁହାଯାଇଛି । ରାଜ୍ୟ ସରକାର ତ୍ୱରିତ ସେବା ଯୋଗାଇବା ସହିତ ବ୍ୟାପୁଥିବା ଗୁଜବକୁ ମୁକାବିଲା କରିବା ଲାଗି ଗଣମାଧ୍ୟମ ସହ ଯୋଗାଯୋଗ ରକ୍ଷା କରି ପଦକ୍ଷେପ ନେବାକୁ କୁହାଯାଇଛି । ବିଦେଶୀ ପର୍ଯ୍ୟଟକ ଏବଂ ରୋଗୀମାନଙ୍କୁ ଚିକିତ୍ସା ସୁବିଧା ଯୋଗାଇ ଦେଉଥିବା ଡାକ୍ତରଖାନାଗୁଡ଼ିକ ସମ୍ବେଦନଶୀଳ ସ୍ଥିତିରେ ରହୁଥିବାରୁ ଏଠାରେ ପହଞ୍ଚୁଥିବା ରୋଗୀ ଓ ଚିକିତ୍ସାଧୀନ ଅବସ୍ଥାରେ ବିଦେଶରୁ ଆସୁଥିବା ଲୋକଙ୍କ ଲାଗି ଆବଶ୍ୟକ ବ୍ୟବସ୍ଥା କରିବାକୁ କୁହାଯାଇଛି ।
ଦକ୍ଷ ସଂସ୍ଥାଗୁଡ଼ିକ ସହାୟତାରେ ଲୋକେ ଯେଭଳି ଆତଙ୍କିତ ନ ହେବେ ସେଥିପାଇଁ ହେଲ୍ପଲାଇନ୍ ଓ ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଡ୍ୟୁୟର ବ୍ୟବସ୍ଥା ଲାଗି କୁହାଯାଇଛି । ବିଦ୍ୟାଳୟଗୁଡ଼ିକରେ ତୁରନ୍ତ ପିଲାମାନଙ୍କ ଲାଗି ସ୍ୱଚ୍ଛତା ଅଭିଯାନ ଆରମ୍ଭ କରିବାକୁ ପରାମର୍ଶ ଦିଆଯାଇଛି । ରାଜ୍ୟରେ ଥିବା ସ୍ଥିତି ସଂକ୍ରାନ୍ତରେ ଆକଳନ ଲାଗି ଏନ୍ଡିଏମ୍ଏ ପରାମର୍ଶ ଦେବା ସହିତ ଅନୁରୂପ ଭାବେ ବିଦ୍ୟାଳୟଗୁଡ଼ିକ ସାମୟିକ ଭାବେ ନିରୀକ୍ଷଣରେ ରଖିବା ଲାଗି କୁହାଯାଇଛି । ଯଦି ସ୍ଥିତି ବିଗିଡେ ତେବେ ବିଭିନ୍ନ ଦପ୍ତର ଓ କର୍ପୋରେଟ୍ ସଂସ୍ଥାର କର୍ମଚାରୀମାନେ ଘରେ ରହି କାର୍ଯ୍ୟ କରିବାକୁ ନିର୍ଦ୍ଦେଶ ଦିଆଯାଇପାରିବ ।
ଜାତୀୟ ଓ ଅନ୍ତର୍ଜାତୀୟ କାର୍ଯ୍ୟ ଲାଗି ଯାତ୍ରା କରୁଥିବା ଲୋକଙ୍କୁ କେନ୍ଦ୍ର ସରକାର ନିୟମିତ ଭାବେ ମାର୍ଗଦର୍ଶିକା ମାଧ୍ୟମରେ ସଚେତନ କରୁଥିବା ବେଳେ ଅତି ଆବଶ୍ୟକ ନ ଥିଲେ ଯାତ୍ରା ନ କରିବା ଲାଗି ଏନ୍ଡିଏମ୍ଏ ପରାମର୍ଶ ଦେଇଛି । ସ୍ଥିତି ଆକଳନ ପରେ ଆବଶ୍ୟକ ସ୍ଥଳେ ଲୋକମାନଙ୍କୁ ଏକାଠି ନ ହେବା ପାଇଁ ନିର୍ଦ୍ଦେଶ ଜାରି କରିବା ସହିତ ଏଭଳି ଏକତ୍ରୀକରଣ କାର୍ଯ୍ୟକ୍ରମରୁ ଦୂରେଇ ରହିବା, ତାରିଖରେ ପରିବର୍ତ୍ତନ ଅଥବା ବାତିଲ କରିବା ପାଇଁ ଏନ୍ଡିଏମ୍ଏ ପରାମର୍ଶ ଦେଇଛି ।