ଶ୍ରୀମନ୍ଦିରର ସ୍ୱଚ୍ଛତା ନେଇ କଠୋର ହୋଇଛି ଶ୍ରୀମନ୍ଦିର ପ୍ରଶାସନ । ଆସନ୍ତା ଏପ୍ରିଲ ପହିଲାରୁ ଶ୍ରୀମନ୍ଦିର ପରିସରରେ ପ୍ଲାଷ୍ଟିକ ବ୍ୟବହାର ହୋଇପାରିବନାହିଁ ଏବଂ ପାନପିକ ପକାଉଥିବା ବ୍ୟକ୍ତି ୫୦୦ ଟଙ୍କାର ତଣ୍ଡ ଗଣିବେ । ଆଜି ବସିଥିବା ଛତିଶା ନିଯୋଗ ବୈଠକରେ ଏଭଳି ନିଷ୍ପତ୍ତି ହୋଇଛି ।
ବୈଠକ ପରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡକ୍ଟର କ୍ରିଷନ କୁମାର କହିଛନ୍ତି ଯେ ଉକ୍ରଳ ଦିବସରୁ ଶ୍ରୀମନ୍ଦିର ମଧ୍ୟରେ ପାନଛେପ ପକାଉଥିବା ବ୍ୟକ୍ତିଙ୍କୁ ଜୋରିମାନା ଦେବାକୁ ପଡିବ । ତାଙ୍କ ଠାରୁ ୫୦୦ ଟଙ୍କା ଜୋରିମାନା ଆଦାୟ ହେବ । ଉଲ୍ଲେଖନୀୟ ଯେ ପୂର୍ବରୁ ପାନପିକ ପକାଇବା ନେଇ କଟକଣା ଜାରି ହୋଇଥିଲେ ମଧ୍ୟ ତାହାକୁ ଅନେକ ମାନୁ ନାହାନ୍ତି ।
ସେହିଭଳି ମହାପ୍ରସାଦ ଯେଭଳି ପ୍ରତିଦିନ ଠିକଣା ସମୟରେ ବାହାରିବ ଓ ଭକ୍ତମାନେ ପାଇପାରିବେ ତାହା ଉପରେ ବୈଠକରେ ଗୁରୁତ୍ୱ ଦିଆଯାଇଛି । ଶ୍ରୀମନ୍ଦିରରେ ପରିସରରେ ଥିବା ବ୍ୟବସାୟୀମାନେ ପଲିଥିନ୍ ବ୍ୟବହାର କରୁଥିବାରୁ ଏହାକୁ ମଧ୍ୟ ନିଷିଦ୍ଧ ପାଇଁ ନିଷ୍ପତ୍ତି ହୋଇଛି । ପଲିଥିନ୍ର ବିକଳ୍ପ ସାମଗ୍ରୀ ବ୍ୟବହାର ଲାଗି ପଦକ୍ଷେପ ନେବାକୁ ବ୍ୟବସାୟୀମାନଙ୍କୁ ଆଗତୁରା ସୂଚନା ଦିଆଯାଇଛି ।
ଅନ୍ୟ ପକ୍ଷରେ ଆଗାମୀ ୯ ତାରିଖର ପଡୁଥିବା ଦୋଳପୂର୍ଣ୍ଣିମା ନୀତି ନିର୍ଘଣ୍ଟ ନେଇ ମଧ୍ୟ ବୈଠକରେ ବିସ୍ତୃତ ଆଲୋଚନା ହୋଇଯାଇଛି । ଆଜି ଅନୁଷ୍ଠିତ ବୈଠକରେ ମୁଖ୍ୟ ପ୍ରଶାସକ ଡକ୍ଟର କୁମାରଙ୍କ ସହିତ ପୁରୀ ଜିଲ୍ଲାପାଳ ବଲୱନ୍ତ ସିଂହ, ଛତିଶା ନିଯୋଗର ସଦସ୍ୟ ଓ ସେବାୟତମାନେ ଉପସ୍ଥିତ ଥିଲେ ।