ରାଜ୍ୟର ୩୦ ଜିଲ୍ଲାରୁ ୪୧୮୦ ନୂଆ କରୋନା ରୋଗୀ ଚିହ୍ନଟ  ରାଜ୍ୟରେ ମୋଟ କରୋନା ସଂକ୍ରମିତଙ୍କ ସଂଖ୍ୟା ୧,୭୧,୩୪୧  ନୂଆ ଚିହ୍ନଟଙ୍କ ମଧ୍ୟରେ କ୍ୱାରେଣ୍ଟାଇନରୁ ୨୪୬୬, ଲୋକାଲ କେସ ୧୭୧୪  ଖୋର୍ଦ୍ଧା ଜିଲ୍ଲାରେ ସର୍ବାଧିକ ୬୮୮ ନୂଆ ରୋଗୀ ଚିହ୍ନଟ  କଟକରୁ ୪୯୨, ଯାଜପୁରରୁ ୧୮୪, ସୁନ୍ଦରଗଡ଼ ଓ ପୁରୀରୁ ୧୬୬କରି, ମୟୂରଭଞ୍ଜ ୧୬୩, ରାୟଗଡ଼ାରୁ ୧୬୦, ଅନୁଗୁଳରୁ ୧୫୫, ବାଲେଶ୍ୱରରୁ ୧୩୩, ଜଗତସିଂହପୁରୁ ୧୨୩, କେନ୍ଦ୍ରାପଡ଼ାରୁ ୧୨୧, ବରଗଡ଼ରୁ ୧୦୦  

୨୦୦ ଗ୍ରାମ ପେଟ୍ରୋଲରେ ଗୁଇନ୍ଦା ସୂଚନା


ରାଜଧାନୀରେ ଗୁଇନ୍ଦା ସୂଚନା ସଂଗ୍ରହ ପାଇଁ ଦାୟିତ୍ୱରେ ଥିବା କର୍ମଚାରୀମାନଙ୍କୁ ଦିନକୁ ମିଳୁଛି ୨୦୦ ଗ୍ରାମ୍‍ରୁ କମ୍‍ ପେଟ୍ରୋଲ । କଥାଟି ଅବିଶ୍ୱାସ ଲାଗୁଥିଲେ ମଧ୍ୟ ସତ୍ୟ । ଏତିକି ପରିମାଣର ପେଟ୍ରୋଲ ନିଜ ଗାଡ଼ିରେ ପକାଇ କର୍ମଚାରୀମାନେ କିଭଳି ସହରର ଏମୁଣ୍ଡ ସେମୁଣ୍ଡ ବୁଲି ଖବର ସଂଗ୍ରହ କରିବେ ତାହା ଅନେକଙ୍କୁ ଆଶ୍ଚର୍ଯ୍ୟ କରୁଛି ।

କମିଶନରେଟ୍‍ ପୋଲିସ ଅଞ୍ଚଳରେ ଗୁଇନ୍ଦା ଖବର ସଂଗ୍ରହ ପାଇଁ ପୋଲିସ କର୍ମଚାରୀମାନେ ନିୟୋଜିତ ଅଛନ୍ତି । ସରକାର ଏମାନଙ୍କୁ ଏବେ ମାସକୁ ୫ ଲିଟର ପେଟ୍ରୋଲ ଯୋଗାଉଛନ୍ତି । ପୂର୍ବରୁ ୩ ଲିଟର ପେଟ୍ରୋଲ ମିଳୁଥିବା ବେଳେ କର୍ମଚାରୀଙ୍କ ଅସନ୍ତୋଷକୁ ଦେଖି ଏହାକୁ ୫ ଲିଟରକୁ ବୃଦ୍ଧି କରିଛନ୍ତି । କର୍ମଚାରୀମାନେ ନିଜ ନିଜ ଗାଡ଼ିରେ ଏତିକି ତେଲ ପକାଇ କିଭଳି ଖବର ସଂଗ୍ରହ କରିବେ ତାହା ଜାଣିପାରୁନାହାନ୍ତି ।

ଗୁଇନ୍ଦା ସୂଚନା ସଂଗ୍ରହ ଦାୟିତ୍ୱରେ ଥିବା କିଛି ପୂର୍ବତନ ପୋଲିସ କର୍ମଚାରୀ କହିଛନ୍ତି ଯେ ରାଜଧାନୀରେ ଏହି କାର୍ଯ୍ୟ ଲାଗି ଦିନକୁ ଅତିକମ୍‍ରେ ୭୦ରୁ ୧୦୦ କିଲୋମିଟର ବୁଲିବାକୁ ପଡ଼ିଥାଏ । ଗୁଇନ୍ଦା ସୂଚନା ସଂଗ୍ରହ ସହିତ କର୍ମଚାରୀମାନେ ପୋଲିସ ବିଭାଗର ବିଭିନ୍ନ କାର୍ଯ୍ୟକ୍ରମ ଓ ପର୍ବପର୍ବାଣୀର କାର୍ଡ ବି ବାଣ୍ଟିଥାନ୍ତି । ତେଣୁ ସକାଳୁ ସଞ୍ଜ ପର୍ଯ୍ୟନ୍ତ ଏମାନେ ସହରର ସାରା ଘୂରି ବୁଲୁଥିବା ବେଳେ କର୍ତ୍ତୃପକ୍ଷ ସେମାନଙ୍କୁ କାହିଁକି ୨୦୦ ଗ୍ରାମ୍‍ର ତେଲ ଯୋଗାଉଛନ୍ତି ତାହା ଜଣାପଡ଼ୁନାହିଁ ।

ଟ୍ରାଫିକ୍‍ ଦାୟିତ୍ୱ ସମ୍ଭାଳିବା ଲାଗି କମିଶନରେଟ୍‍ ପୋଲିସ ମାଳ ମାଳ ଦୁଇଚକିଆ ଯାନ ଆଣୁଛନ୍ତି । ହେଲେ ଗୁଇନ୍ଦା ସୂଚନା ସଂଗ୍ରହ ଦାୟିତ୍ୱରେ ଥିବା କର୍ମଚାରୀମାନଙ୍କୁ ଗାଡ଼ି ଯୋଗାଯାଉନାହିଁ କି ସେମାନଙ୍କ ଗାଡ଼ିର ରକ୍ଷଣାବେକ୍ଷଣ ଲାଗି ଅର୍ଥ ମିଳୁନାହିଁ । ଫଳରେ ଗୁଇନ୍ଦା ସୂଚନା ସଂଗ୍ରହ ପାଇଁ କର୍ମଚାରୀଙ୍କ ମଧ୍ୟରେ ଯେଭଳି ଆଗ୍ରହ ପ୍ରକାଶ ପାଇବା କଥା ତାହା ହେଉନାହିଁ ।

ସେହିଭଳି ଏହି ଦାୟିତ୍ୱରେ ଥିବା କର୍ମଚାରୀମାନେ କୌଣସି ଆକସ୍ମିକ ଦୁର୍ଘଟଣାର ସମ୍ମୁଖୀନ ହେଲେ ସେମାନଙ୍କ ଲାଗି ୨୦ ହଜାର ଟଙ୍କାର ସହାୟତା ବ୍ୟବସ୍ଥା ରହିଛି । ତେବେ କିଛି କର୍ମଚାରୀଙ୍କ କହିବା କଥା ଯେ କୌଣସି କାରଣରୁ ଯଦି ସେମାନେ ଦୁର୍ଘଟଣାର ଶିକାର ହୁଅନ୍ତି ତେବେ ଘରୋଇ ଡାକ୍ତରଖାନାରେ ଦାଖଲ ପାଇଁ ଏହାଠାରୁ ଅଧିକ ଅର୍ଥ ଆବଶ୍ୟକ ପଡ଼ିବ ।

ରାଜଧାନୀରେ ଏବେ ପ୍ରତିଦିନ ଚୋରି ଡକାୟତି ସହ ଗଣ୍ଡଗୋଳ ଓ ମାଡ଼ିପିଟ୍‍ ଭଳି ଆଇନ୍‍ଶୃଙ୍ଖଳା ପରିସ୍ଥିତି ଘଟୁଥିବା ବେଳେ ଗୁଇନ୍ଦା ସୂଚନା ସଂଗ୍ରହ ଉପରେ ଗୁରୁତ୍ୱାରୋପ କରାଯାଉଛି । ହେଲେ ସୂଚନା ସଂଗ୍ରହ ଦାୟିତ୍ୱରେ ଥିବା କର୍ମଚାରୀମାନଙ୍କ ଏଭଳି ଅବସ୍ଥା ଦେଖିଲା ପରେ କର୍ତ୍ତୃପକ୍ଷଙ୍କ ନିକଟରେ ଗୁଇନ୍ଦା ସୂଚନା କିଭଳି ପହଞ୍ଚୁଥିବ ଓ ଦାୟିତ୍ୱରେ ଥିବା କର୍ମଚାରୀମାନେ କେତେ ଆଗ୍ରହରେ କାମ କରୁଥିବେ ତାହା ସହଜରେ ଅନୁମେୟ । ଆଇନ୍‍ ଶୃଙ୍ଖଳା ରକ୍ଷା ଦିଗରେ ଗୁଇନ୍ଦା ସୂଚନା ସଂଗ୍ରହର ଗୁରୁତ୍ୱପୂର୍ଣ୍ଣ ଭୂମିକା ଥିବା ବେଳେ ଏଥିପାଇଁ ସ୍ୱତନ୍ତ୍ର ଅର୍ଥ ବ୍ୟବସ୍ଥା କରିବା ସହିତ ପ୍ରତିକୂଳ ପରିସ୍ଥିତିରେ କାର୍ଯ୍ୟ କରୁଥିବା କର୍ମଚାରୀମାନଙ୍କୁ ବୀମାଭୁକ୍ତ କରିବା ଲାଗି ଅବସରପ୍ରାପ୍ତ ପୋଲିସ ଅଧିକାରୀମାନେ ମତ ଦେଉଛନ୍ତି ।  



Mayfair Lagoon
SOA


AMRI Hospital Bhubaneswar
M/s S N MOHANTY -->

ସମ୍ପାଦକ: ବ୍ରଜ କିଶୋର ମିଶ୍ର

©Tathya Media Pvt. Ltd. 2020