ସମଗ୍ର ଦେଶ କରୋନା ଯୋଗୁଁ ଲକ୍ ଡାଉନ୍ ହୋଇଥିବାବେଳେ ଏହି ସମୟରେ ଅସହାୟ ଶିଶୁମାନଙ୍କୁ ସମସ୍ତ ପ୍ରକାର ସହଯୋଗ ଯୋଗାଇ ଦେବାପାଇଁ କହିଛନ୍ତି ଜାତୀୟ ଶିଶୁ ଅଧିକାର ସୁରକ୍ଷା କମିଶନ (ଏନ୍ସିପିସିଆର) । କମିଶନ କହିଛନ୍ତି ଯେ ଦେଶର ଗଳିକନ୍ଦିରେ ଅନେକ ଶିଶୁ ଅଛନ୍ତି । ଏମାନଙ୍କ ମଧ୍ୟରେ ପିତୃମାତୃହୀନ, ହଜି ଯାଇଥିବା ଶିଶୁ ଓ ଘର ଛାଡି ପଳାଇ ଆସିଥିବା ପିଲାଙ୍କ ସହିତ ଭିକ୍ଷାବୃତ୍ତି କରୁଥିବା ପିଲା ବି ରହିଛନ୍ତି । ଏମାନଙ୍କ ମଧ୍ୟରୁ କେତେକ ଏକୁଟିଆ ରହୁଥିବାବେଳେ ଆଉ କେତେକ ପରିବାର ସହିତ ରହୁଛନ୍ତି ।
ବର୍ତ୍ତମାନ ସ୍ଥିତିରେ ଏମାନଙ୍କ ପାଇଁ ପଦକ୍ଷେପ ଗ୍ରହଣ ଲାଗି ଏନ୍ସିପିସିଆର ପକ୍ଷରୁ କେତେକ ପରାମର୍ଶ ଦିଆଯାଇଛି । ଏଥି ମଧ୍ୟରେ ଶିଶୁ ମଙ୍ଗଳ ପୁଲିସ୍ ଅଫିସର (ସିଡବ୍ଲ୍ୟୁପିଓ) ମାନେ ନିଜ ନିଜ ଅଞ୍ଚଳରେ ଏପରି ଶିଶୁ ସଂକ୍ରାନ୍ତରେ ସୂଚନା ସଂଗ୍ରହ କରିବେ । ସେହିଭଳି ଚାଇଡଲାଇନ୍ କର୍ତ୍ତୃପକ୍ଷଙ୍କ ମଧ୍ୟ ଏଭଳି ଶିଶୁମାନଙ୍କୁ ସିଡବ୍ଲ୍ୟୁପିଓମାନଙ୍କ ନଜରକୁ ଆଣିବାକୁ ଅନୁରୋଧ କରାଯାଇଛି । ଏଭଳି ଶିଶୁଙ୍କୁ ପାଇଲେ ତୁରନ୍ତ ସେମାନଙ୍କ ନାମ,ବୟସ, ଠିକଣା, ଏକୁଟିଆ ରହୁଛନ୍ତି କିମ୍ବା ପରିବାର ସହିତ ଅଛନ୍ତି ତାହାର ବିସ୍ତୃତ ସଗ୍ରହ କରି ସ୍ଥାନୀୟ ଶିଶୁ ମଙ୍ଗଳ କମିଟିକୁ ଅବଗତ କରାଯିବ ।
ସିଡବ୍ଲ୍ୟୁପିଓମାନେ ପ୍ରତ୍ୟେକ ଶିଶୁଙ୍କର ଡାକ୍ତରୀ ପରୀକ୍ଷାର ବନ୍ଦୋବସ୍ତ କରିବେ । ଯଦି କାହାଠାରେ କରୋନା ଲକ୍ଷଣ ଦେଖାଯାଏ ଓ ତାଙ୍କୁ ମେଡିକାଲ ସହାୟତା ଆବଶ୍ୟକ ହୁଏ ତେବେ କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରାଳୟ ଦ୍ୱାରା ଜାରି ମାର୍ଗଦର୍ଶିକା ପାଳନ ଲାଗି କୁହାଯାଇଛି । ଏ କ୍ଷେତ୍ରରେ ସହାୟତା ପାଇଁ ଏନ୍ଜିଓମାନଙ୍କୁ ସାମିଲ ଲାଗି କୁହାଯାଇଛି । ସେହିଭଳି ଶିଶୁମାନଙ୍କୁ ଖାଦ୍ୟ, ଜଳ, ଲୁଗାପଟା, ପରିଷ୍କାର ପରିଚ୍ଛନ୍ନତା, ମୌଳିକ ଡାକ୍ତରୀ ଚିକିତ୍ସା ଆଦି ନିଶ୍ଚିତ କରିବାପାଇଁ ଏନ୍ସିପିସିଆର ପରାମର୍ଶ ଦେଇଛନ୍ତି । ଏ କ୍ଷେତ୍ରରେ ଶିଶୁ ଓ ସେମାନଙ୍କ ପରିବାର ଗୁଡିକୁ ଆବଶ୍ୟକ ସହାୟତା ପାଇଁ ସ୍ଥାନୀୟ ଏନ୍ଜିଓମାନଙ୍କ ସହଯୋଗ ନେବାକୁ କୁହାଯାଇଛି ।
ବାଳିକାମାନଙ୍କ ପାଇଁ ଉଦ୍ଦିଷ୍ଟ ଆଶ୍ରୟସ୍ଥଳକୁ ଝିଅପିଲାମାନଙ୍କୁ ପଠାଯିବ । ସେଠାରେ ସେମାନଙ୍କ ସୁରକ୍ଷା ଉପରେ ସର୍ବାଧିକ ଗୁରୁତ୍ୱ ଦେବାକୁ କୁହାଯାଇଛି । ଯଦି ଝିଅଟି ଚାଲାଣ ହେଉଥିବା ଅବସ୍ଥାରେ ଠାବ ହେବ ତେବେ ତାକୁ ତୁରନ୍ତ ଖାଦ୍ୟ, ଆଶ୍ରୟସ୍ଥଳ, ପୋଷାକ, ମେଡିକାଲ ସହାୟତା ସହିତ ପରାମର୍ଶ ଦିଆଯିବା । ଏହା କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରାଳୟର ଉଜ୍ୱଳା ଯୋଜନାରେ ଯୋଗାଇବାକୁ କୁହାଯାଇଛି । ଯେଉଁଠାରେ ଶିଶୁଙ୍କ ପରିବାର ମଜୁରିଆ ଭାବେ କାର୍ଯ୍ୟ କରୁଥିବେ ସେଠାରେ ଆବଶ୍ୟକତାକୁ ଦେଖି ସେହି ପରିବାର ଲାଗି ସ୍ଥାନୀୟ ପଞ୍ଚାୟତ କିମ୍ବା ପୌର କର୍ତ୍ତୃପକ୍ଷଙ୍କ ସହାୟତାରେ ଖାଦ୍ୟ, ଆଶ୍ରୟସ୍ଥଳ ଓ ମେଡିକାଲ ସୁବିଧା କରିବାକୁ କୁହାଯାଇଛି । ଏହି ସମସ୍ତ ପ୍ରକ୍ରିୟାକୁ ଜିଲ୍ଲାପାଳ ପରିଚାଳନା କରିବେ ।
ଯେଉଁ ଶିଶୁମାନେ ଶିଶୁ ଯତ୍ନକାରୀ ଅନୁଷ୍ଠାନରେ ଅଛନ୍ତି ରାଜ୍ୟ ସରକାର ଅଗ୍ରାଧିକାର ଭିତ୍ତିରେ ଏହି ଶିଶୁମାନଙ୍କୁ ସୁରକ୍ଷା ଯୋଗାଇଦେବାକୁ କୁହାଯାଇଛି । ଅନୁଷ୍ଠାନର କର୍ମଚାରୀମାନଙ୍କୁ ନିୟମିତ ଭାବେ କରୋନା ବିରୁଦ୍ଧରେ କିଭଳି ପଦକ୍ଷେପ ନିଆଯିବ ସେ ସଂକ୍ରାନ୍ତରେ ସଚେତନ କରାଯିବ । ଅନୁଷ୍ଠାନରେ ଥିବା ଶିଶୁ ଓ କର୍ମଚାରୀମାନଙ୍କୁ ଘର ଭିତରେ ରଖିବା ଉପରେ ଗୁରୁତ୍ୱ ଦିଆଯାଇଛି । ସେହିଭଳି ଅନୁଷ୍ଠାନରେ ଆବଶ୍ୟକ ମୁତାବକ ଔଷଧ ରଖାଯିବ । ଜଣେ ହେଲେ ପିଲା ଏଭଳି ବିପଦଜନକ ପରିସ୍ଥିତିରେ ଯେଭଳି ଗଳି କନ୍ଦିରେ ନବୁଲନ୍ତି ସେ ଦିଗରେ ପଦକ୍ଷେପ ନେବାକୁ ଏନ୍ସିପିସିଆର ପକ୍ଷରୁ କୁହାଯାଇଛି ।