କରୋନା ମୁକାବିଲା ଲାଗି କେନ୍ଦ୍ର ସରକାର ଘୋଷଣା କରିଥିବା ୧ଲକ୍ଷ ୭୦ହଜାରକୋଟି ଟଙ୍କାର ଆର୍ଥିକ ପ୍ୟାକେଜ ଲକ୍ ଡାଉନ୍ ସଙ୍କଟରେ ଦେଶର ଗରିବ ଜନତାଙ୍କୁ ଖାଦ୍ୟ ଓ ଆର୍ଥିକ ସୁରକ୍ଷା ଯୋଗାଇଦେବ ବୋଲି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିବା ସଂଗେ ସଂଗେ ଏଥିପାଇଁ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଅର୍ଥମନ୍ତ୍ରୀ ନିର୍ମଳା ସୀଥାରମଣଙ୍କୁ ଧନ୍ୟବାଦ ଦେଇଛନ୍ତି
ଶ୍ରୀ ପ୍ରଧାନ କହିଛନ୍ତି ଯେ ଏଭଳି ସଙ୍କଟ ସମୟରେ ଅଭୂତପୂର୍ବ ପଦକ୍ଷେପ ପାଇଁ ଆହ୍ୱାନ କରେ । ଏଭଳି ସମୟରେ ଏକ ଦାୟିତ୍ୱବାନ ସରକାର ହେଉଛି ମୋଦି ସରକାର । ଆଜି ଘୋଷଣା ହୋଇଥିବା ଅନେକ ପଦକ୍ଷେପ ଗ୍ରାମୀଣ ତଥା ସହାଞ୍ଚଳରେ ଗରିବ, କୃଷକ, ସ୍ୱାସ୍ଥ୍ୟକର୍ମୀ, ପ୍ରବାସୀ ଶ୍ରମିକ, ବରିଷ୍ଠ ନାଗରିକ ତଥା ସମାଜର ଅନ୍ୟାନ୍ୟ ଦୁର୍ବଳ ଶ୍ରେଣୀଙ୍କ ଉପରେ କରୋନା ମହାମାରୀର ଆର୍ଥିକ ସମସ୍ୟାକୁ ହ୍ରାସ କରିବ ।
କେନ୍ଦ୍ରମନ୍ତ୍ରୀ କହିଛନ୍ତିଯେ ଏହି ଯୋଜନାରେ ବାଙ୍କ୍ ଖାତାରେ ଅର୍ଥ ପ୍ରଦାନ, ବୀମା ସୁରକ୍ଷା, ଖାଦ୍ୟ ସୁରକ୍ଷାକୁ ସୁନିଶ୍ଚିତ କରିବା ଏବଂ ପ୍ରଧାନମନ୍ତ୍ରୀ ଉଜ୍ୱଳା ଯୋଜନାରେ ସମସ୍ତ ହିତାଧିକାରୀଙ୍କୁ ମାଗଣାରେ ୩ଟି ଏଲପିଜି ରନ୍ଧନ ଗ୍ୟାସ ଆଗାମୀ ୩ମାସ ପାଇଁ ଯୋଗାଇଦେବା ଓ ଅନ୍ୟ ନିଷ୍ପତ୍ତି ଲକ୍ଷାଧିକ ଗରିବ ଲୋକଙ୍କୁ ଲାଭ ପହଞ୍ଚାଇବ ।
ସେହିପରି କରୋନା ସଂକ୍ରମଣ ମୁକାବିଲାରେ ନିୟୋଜିତ ପ୍ରତ୍ୟେକ ଡାକ୍ତର, ପାରାମେଡିକ୍ସ ସ୍ୱାସ୍ଥ୍ୟକର୍ମୀଙ୍କ ଲାଗି ୫୦ଲକ୍ଷ ଟଙ୍କାର ବୀମା ଘୋଷଣା କରାଯାଇଛି । ଦେଶର ୩କୋଟି ଗରିବ ବରିଷ୍ଠ ନାଗରିକ,ଗରିବ ବିଧବା, ଏବଂ ଗରିବ ଦିବ୍ୟାଙ୍ଗମାନଙ୍କପାଇଁ ଅର୍ଥମନ୍ତ୍ରୀ ୧୦୦୦କୋଟି ଟଙ୍କାର ଅନୁକମ୍ପାରାଶି ଘୋଷଣା କରିଛନ୍ତି । ୨୦କୋଟି ମହିଳା ଜନଧନ ଯୋଜନା ଆକାଉଣ୍ଟଧାରୀଙ୍କୁ ଆସନ୍ତା ୩ମାସପାଇଁ ମାସିକ ୫୦୦ ଟଙ୍କା ପାଇବା ନେଇ ନିଷ୍ପତ୍ତି ହୋଇଛି ।
ଏହାଛଡା ୬୩ଲକ୍ଷ ମହିଳା ସ୍ୱୟଂ ସହାୟିକା ଗୋଷ୍ଠିକଙ୍କ ପାଇଁ ବିନା ବନ୍ଧକରେ ୨୦ଲକ୍ଷ ଟଙ୍କାର ଋଣ ଦିଆଯିବ ଏବଂ ଏହାଦ୍ୱାରା ୭କୋଟି ପରିବାର ଉପକୃତ ହେବେ ବୋଲି ଶ୍ରୀ ପ୍ରଧାନ କହିଛନ୍ତି । ସେ କହିଛନ୍ତି ଯେ ଆମେ ଏକାଠି ଅଛୁ, ଆମେ ଏହି ଅଦୃଶ୍ୟ ଶତ୍ରୁ ସହିତ ଲଢିବା ଏବଂ ବିଜୟୀ ହେବା । ସରକାରଙ୍କ ପକ୍ଷରୁ ଦେଶର ଅର୍ଥନୀତି ଓ ସମାଜ ଉପରେ ସକରାତ୍ମକ ପ୍ରଭାବକୁ କମ୍ କରିବାକୁ ସସସ୍ତ ଆବଶ୍ୟକୀୟ ପଦକ୍ଷେପ ନିଆଯାଉଛି ବୋଲି ସେ କହିଛନ୍ତି ।