ଦୁର୍ବଳ ହେଉଛି ତିତ୍‍ଲି

ଆନ୍ଧ୍ରପ୍ରଦେଶର ଶ୍ରୀକାକୁଲମ ଜିଲ୍ଲା ଅର୍ନ୍ତଗତ ପଲାସା ନିକଟରେ ସ୍ଥଳଭାଗ ଛୁଇଁବାପରେ ବାତ୍ୟା ତିତ୍‍ଲି କ୍ରମଶଃ ଦୁର୍ବଳ ହେବାରେ ଲାଗିଛି । ଆଜି ଭୋର ୪ଟା ୩୦ରୁ ୫ଟି ୩୦ ମଧ୍ୟରେ ୧୬୫ କିଲୋମିଟର ବେଗରେ ବାତ୍ୟା ସ୍ଥଳଭାଗ ସ୍ପର୍ଶ କରିଥିବା ସ୍ୱତନ୍ତ୍ର ରିଲିଫ କମିଶନର ବିଷ୍ଣୁପଦ ସେଠୀ ସୂଚନା ଦେଇଛନ୍ତି ।

ବାତ୍ୟା ସ୍ଥଳ ଭାଗ ସ୍ପର୍ଶ ସମୟରେ ଗୋପାଳପୁର ଠାରେ ପବନର ବେଗ ଘଣ୍ଟାପ୍ରତି ୧୨୬ କିଲୋମିଟର ଥିବା ରେକର୍ଡ କରାଯାଇଛି । ଏଥିଯୋଗୁଁ ଗଞ୍ଜାମ ଜିଲ୍ଲାରେ ଗଛ ଭାଙ୍ଗିବା, ଘର ଛପର ଉଡିଯିବା, ରାସ୍ତା ଅବରୋଧ ଓ ବିଦ୍ୟୁତ୍‍ ଖୁଣ୍ଟ ଉପୁଡିବା ଭଳି ଘଟଣା କେତେକ ସ୍ଥାନରେ ଘଟିଛି ।

ସ୍ଥଳଭାଗ ଛୁଇଁବାପରେ ବାତ୍ୟା କ୍ରମଶଃ ଦୁର୍ବଳ ହେବାରେ ଲାଗିଥିବାବେଳେ ଏହାର ପ୍ରଭାବରେ ଗଞ୍ଜାମ, ଗଜପତି ଓ ପୁରୀ ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି ।

ବାତ୍ୟା ପାଇଁ ସମଗ୍ର ୩୦ଟି ଜିଲ୍ଲାରେ ସତର୍କସୂଚନା ଜାରି ହୋଇଥିବାବେଳେ ଅଙ୍ଗନବାଡିକେନ୍ଦ୍ର ଓ ଶିକ୍ଷାନୁଷ୍ଠାନ ଗୁଡିକୁ ସରକାର ଆସନ୍ତାକାଲି ପର୍ଯ୍ୟନ୍ତ ଛୁଟି ଘୋଷଣା କରିଛନ୍ତି ।

ସର୍ତକତାମୂଳକ ପଦକ୍ଷେପ ସ୍ୱରୂପ ତଳିଆ ଅଞ୍ଚଳରୁ ୩ଲକ୍ଷ ଲୋକଙ୍କୁ ସୁରକ୍ଷିତ ସ୍ଥାନକୁ ନିଆଯାଇଥିବାବେଳେ ସେମାନଙ୍କୁ ୧୧୧୨ଟି ବାତ୍ୟା ଆଶ୍ରୟସ୍ଥଳୀରେ ରଖାଯାଇଛି ।

ଗଞ୍ଜାମ, ଗଜପତି, ପୁରୀ, ଖୋରଧା, ଜଗତ୍‍ସିଂହପୁର, କେନ୍ଦ୍ରାପଡା, କଟକ, ବାଲେଶ୍ୱର ଓ ମୟୁରଭଞ୍ଜ ଜିଲ୍ଲାରେ ଓଡ୍ରାଫ ଟିମ୍‍କୁ ସଜାଗ ରଖାଯାଇଥିବାବେଳେ ଏନ୍‍ଡିଆରଏଫ୍‍ ଟିମ୍‍ ମଧ୍ୟ ବାତ୍ୟା ମୁକାବିଲା ଲାଗି ମୁତୟନ କରାଯାଇଛି ।

ଇତି ମଧ୍ୟରେ ଗଞ୍ଜାମ ଜିଲ୍ଲାରେ ୧୦୫ ଓ ଜଗତ୍‍ସିଂହପୁର ଜିଲ୍ଲାରେ ୧୮ଜଣ ପ୍ରସୂତୀଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି ।