ଜମିହରାଙ୍କୁ ମିଳୁନି ଅଂଶଧନ

ଶିଳ୍ପ ପାଇଁ ଜମି ହରାଉଥିବା ଲୋକଙ୍କୁ ସମ୍ପୃକ୍ତ କମ୍ପାନୀର ଲାଭାଂଶ ଅର୍ଥ ପ୍ରଦାନ ଲାଗି ଥିବା ଯୋଜନା ଆଇନ୍‍ଗତ ଓ ପ୍ରଶାସନିକ ବାଧା ଯୋଗୁଁ କାର୍ଯ୍ୟକାରୀ ହୋଇପାରୁନାହିଁ । ୨୦୧୪ରେ ବିଜେଡି ନିର୍ବାଚନୀ ଇସ୍ତାହାରରେ ଜମିହରାମାନଙ୍କୁ କମ୍ପାନୀର ଅଂଶଧନ ଦିଆଯିବ ବୋଲି କୁହାଯାଇଥିବାବେଳେ ୪ବର୍ଷ ପରେ ବି ତାହା ଲାଗୁ ହୋଇନାହିଁ ।

ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗ ପକ୍ଷରୁ ବିଭାଗର ସଫଳତା ବଖାଣିବା ସମୟରେ ରାଜ୍ୟ ସରକାର ବର୍ତ୍ତମାନ ସୁଦ୍ଧା ଏ ଦିଗରେ କୌଣସି ପଦକ୍ଷେପ ନେଇନଥିବା ଦୃଷ୍ଟିକୁ ଆସିଛି । ଅନୁରୂପ ଭାବେ ବିଜେଡି ତାହାର ନିର୍ବାଚନୀ ଇସ୍ତାହାରରେ ଶିଳ୍ପସଂସ୍ଥାମାନେ ଗ୍ରାମପଞ୍ଚାୟତକୁ ଅଂଶଧନ ଦେବା ବାଧ୍ୟତାମୂଳକ ହେବବୋଲି କହିଥିଲା ।

ଏହାଦ୍ୱାରା ଗ୍ରାମପଞ୍ଚାୟତ ଓ ଜମିହରାମାନେ ନିୟମିତ ଭାବେ ଅର୍ଥ ପାଇବାର ବ୍ୟବସ୍ଥା ରହିଥିଲା । ଏଭଳି ଚିନ୍ତାଧାରାକୁ ରାଜ୍ୟର ମାନବ ଅଧିକାର ଓ ସାମାଜିକ କର୍ମୀମାନେ ପ୍ରଶଂସା କରିଥିବାବେଳେ ପ୍ରଥମ ରାଜ୍ୟଭାବେ ଓଡିଶା ଏଭଳି ପଦକ୍ଷେପ ନେଇଥିଲା ।

କିନ୍ତୁ ଚାରିବର୍ଷ ପରେ ଏହା କାର୍ଯ୍ୟକାରୀ ହୋଇପାରି ନାହିଁ । ଇତି ମଧ୍ୟରେ କର୍ପୋରେଟ ସଂସ୍ଥା ଗୁଡିକ ଏହାକୁ ବିରୋଧ କରିବା ସହିତ ରାଜ୍ୟ ସରକାରଙ୍କର ଏହି ମହତ୍ୱାକାଂକ୍ଷୀ ଯୋଜନାକୁ କାର୍ଯ୍ୟକାରୀ କରାଇ ଦେଉନଥିବା ସାମାଜିକ କର୍ମୀମାନେ କହୁଛନ୍ତି ।

୨୦୧୪ ମସିହାରେ ଚତୁର୍ଥଥର ପାଇଁ ଶପଥ ନେବାପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କର ପ୍ରଥମ ମନ୍ତ୍ରୀମଣ୍ଡଳ ବୈଠକରେ ଜମିହରା ଓ ପଞ୍ଚାୟତ ଗୁଡିକ କିଭଳି କମ୍ପାନୀ ଠାରୁ ଅର୍ଥ ପାଇବେ ସେଥିପାଇଁ ନିୟମାବଳୀ ପ୍ରସ୍ତୁତ ଲାଗି ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗକୁ କହିଥିଲେ । ତଦନୁଯାୟୀ ବିଭାଗମାନେ ଏ ସଂକ୍ରାନ୍ତରେ ସେମାନଙ୍କର ମତାମତ ପ୍ରଦାନ ସହିତ ଆଇନ୍‍ ବ୍ୟବସ୍ଥାରେ ପରିବର୍ତ୍ତନ ପାଇଁ ପଦକ୍ଷେପ ନେବାକଥା ।

କିନ୍ତୁ ବିଭାଗମାନେ ଏ କ୍ଷେତ୍ରରେ ସମ୍ପୂର୍ଣ୍ଣ ନିରବ ଥିବା ଜଣେ ବରିଷ୍ଠ ଅଧିକାରୀ କହିଛନ୍ତି । ବଳବତ୍ତର ଥିବା ସ୍ୱଚ୍ଛ ଜମି ଅଧିଗ୍ରହଣ, ଥଇଥାନ ଓ ପୁର୍ନବାସ, କ୍ଷତିପୂରଣ ପ୍ରଦାନ ଅଧିକାର ଆଇନ୍‍ ୨୦୧୩ ରେ ସଂଶୋଧନ ଆଣି ସେଥିରେ ଲାଭାଂଶ ଅଂଶଧନ ସାମିଲର ଆବଶ୍ୟକତା ରହିଛି । ହେଲେ ଆଇନ୍‍ ଅଧିକାରୀମାନେ ଏଭଳି ଉତ୍ତମ ପ୍ରସ୍ତାବକୁ ସାମିଲ ପାଇଁ କୁଣ୍ଠାପ୍ରକାଶ କରୁଛନ୍ତି । ଏହି ଆଇନ୍‍ଟି ସଂସଦର ଅନୁମୋଦନ ଲାଭ ସହିତ ସମଗ୍ର ଦେଶରେ ଜମି ଅଧିଗ୍ରହଣ ସହିତ କ୍ଷତିପୂରଣ ପ୍ରଦାନ, ଥଇଥାନ ଓ ପୁର୍ନବାସ କ୍ଷେତ୍ରରେ କାର୍ଯ୍ୟକାରୀ ହେଉଛି ।

ମିଳିଥିବା ସୂଚନା ଅନୁଯାୟୀ ଆଇନ୍‍ ବିଶେଷଜ୍ଞମାନେ ଭାବୁଛନ୍ତି ଯେ କେନ୍ଦ୍ରର ଏହି ଆଇନ୍‍କୁ ରାଜ୍ୟ ବିଧାନସଭାରେ ସଂଶୋଧନ କରାଯାଇ ପାରିବନାହିଁ । ତେଣୁ ସେମାନେ ଏ ଦିଗରେ ପଦକ୍ଷେପ ଗ୍ରହଣ କରୁନାହାନ୍ତି । ଅନୁରୂପ ଭାବେ କମ୍ପାନୀପାଇଁ ଜମି ଅଧିଗ୍ରହଣ କରୁଥିବା ବିଭାଗ ମଧ୍ୟ ଏ କ୍ଷେତ୍ରରେ ନିରବତା ଅବଲମ୍ବନ କରୁଛି । ଫଳରେ ବିଜେଡି ସରକାର ଲୋକଙ୍କ ନିକଟରେ କରିଥିବା ଏତେ ବଡ ପ୍ରତିଶ୍ରୁତି ବର୍ତ୍ତମାନସୁଦ୍ଧା କାର୍ଯ୍ୟକାରୀ ହୋଇପାରୁନାହିଁ ।