ମିଳୁ ନାହାନ୍ତି ସହଯୋଗୀ

ବନ୍ଦର ନିର୍ମାଣ ପାଇଁ ରାଜ୍ୟ ସରକାରଙ୍କୁ ସହଯୋଗୀ ମିଳୁନାହାନ୍ତି । ଏଥିପାଇଁ ରାଜିନାମା ହୋଇଥିବା ୧୩ଟି ବନ୍ଦର ମଧ୍ୟରୁ ପ୍ରାୟ ୮ଟିର କାମ ଆଗେଇ ପାରୁନାହିଁ ।

ବାଣିଜ୍ୟ ଓ ପରିବହନ ବିଭାଗର ଚାରିବର୍ଷର ସଫଳତା ସଂକ୍ରାନ୍ତରେ ସୂଚନା ଦେବାବେଳେ ଏହା କହିଛନ୍ତି ରାଜ୍ୟ ବାଣିଜ୍ୟ ଓ ପରିବହନ ମନ୍ତ୍ରୀ ଡାକ୍ତର ନୃସିଂହ ସାହୁ ।

ମନ୍ତ୍ରୀ କହିଛନ୍ତି ଯେ ଜଟାଧାର ମୁହାଣରେ ଜେଏସ୍‍ଡବ୍ଲ୍ୟୁ ବନ୍ଦର ନିର୍ମାଣ କରିବାକୁ ସ୍ଥିର ହୋଇଥିବାବେଳେ ଅସ୍ତରଙ୍ଗ ବନ୍ଦର ଉପରେ ଅଦାଲତ ରହିତାଦେଶ ଜାରି କରିଛନ୍ତି । କେନ୍ଦ୍ରାପଡା ଠାରେ ମହାନଦୀ ମୁହାଣରେ ପ୍ରସ୍ତାବିତ ନଦୀ ଭିତ୍ତିକ ବନ୍ଦର ଓ ସୁବର୍ଣ୍ଣରେଖା ବନ୍ଦର କାର୍ଯ୍ୟ ତ୍ୱରାନ୍ୱିତ କରାଯାଉଛି ।

ଧାମରା ବନ୍ଦରର ଦ୍ୱିତୀୟ ସମ୍ପ୍ରସାରଣ କାର୍ଯ୍ୟ ଦ୍ରୁତ ଗତିରେ ଚାଲୁଅଛି ଯାହାଦ୍ୱାରରା ୩୩୪ ନିୟୁତ ମେଟ୍ରିକ ଟନ୍‍ ପଣ୍ୟ କାରବାର ହୋଇପାରିବ ଏବଂ ସର୍ବଭାରତୀୟ ସ୍ତରରେ ଏହା ଏକ ବୃହତ୍‍ ବନ୍ଦରଭାବେ ପରିଗଣିତ ହେବ ।

୨୦୧୩ ମସିହାରେ କାର୍ଯ୍ୟକ୍ଷମ ହୋଇଥିବା ଗୋପାଳପୁର ବନ୍ଦର ପରବର୍ତ୍ତୀ ସମୟରେ ଫାଇଲିନ୍‍ ବାତ୍ୟା ଯୋଗୁଁ କ୍ଷତିଗ୍ରସ୍ତ ହେବା ସହିତ ସାମୟିକଭାବେ ବନ୍ଦ ରହିଥିଲା । ବର୍ତ୍ତମାନ ୧୪୦୦ କୋଟି ଟଙ୍କା ବିନିଯୋଗରେ ଏହି ବନ୍ଦରର ସମ୍ପ୍ରସାରଣ କାର୍ଯ୍ୟ ଚାଲୁଥିବାବେଳେ ଆସନ୍ତାବର୍ଷ ଜୁନ୍‍ମାସ ସୁଦ୍ଧା ସମ୍ପୂର୍ଣ୍ଣ ହେବାର ଲକ୍ଷ୍ୟ ରହିଛି ।

କେନ୍ଦ୍ର ସରକାରଙ୍କ ବହୁ ପ୍ରଚାରିତ ସାଗରମାଳା ଯୋଜନା ରାଜ୍ୟରେ ଆଗେଇ ପାରୁନଥିବା ମନ୍ତ୍ରୀ ଡାକ୍ତର ସାହୁ କହିଛନ୍ତି । ଏପରିକି ସାଗରମାଳା ଯୋଜନାରେ ବନ୍ଦର ବିକାଶ ଲାଗି କେନ୍ଦ୍ର ସରକାରଙ୍କୁ ବାରମ୍ବାର ପତ୍ର ଲେଖାଗଲେ ମଧ୍ୟ ସେଠାରୁ କୌଣସି ଉତ୍ତର ମିଳୁନାହିଁ ।

ରେଳ ସଂଯୋଗ ସଂକ୍ରାନ୍ତରେ ସୂଚନାଦେଇ ମନ୍ତ୍ରୀ କହିଛନ୍ତି ଯେ ରାଜ୍ୟର ୬ଟି ଜିଲ୍ଲାରେ ରେଳ ସଂଯୋଗ ନାହିଁ । ଗତବର୍ଷ ନୟାଗଡକୁ ରେଳ ଚଳାଚଳ ହୋଇଥିବାବେଳେ ଆସନ୍ତା ଜୁନ୍‍ ସୁଦ୍ଧା କେନ୍ଦ୍ରାପଡାକୁ ରେଳ ସଂଯୋଗ ହେବ । ଅବଶିଷ୍ଟ ଜିଲ୍ଲା ଗୁଡିକୁ ରେଳ ସଂଯୋଗ ପାଇଁ ରାଜ୍ୟ ସରକାର ମାଗଣାରେ ଜମି ଓ ଅନ୍ୟାନ୍ୟ ଆର୍ôଥକ ସହାୟତା ଯୋଗାଇ ଦେଉଛନ୍ତି ।