ବାତ୍ୟା ସୂଚନାପାଇଁ ୧୨୨ ଟାୱାର

ଜନସାଧାରଣଙ୍କୁ ବାତ୍ୟା ଓ ସୁନାମୀ ଭଳି ପ୍ରାକୃତିକ ବିପର୍ଯ୍ୟୟ ସଂକ୍ରାନ୍ତରେ ଆଗୁଆ ସୂଚନା ଦେବାପାଇଁ ରାଜ୍ୟର ୬ଟି ଉପକୂଳବର୍ତ୍ତୀ ଜିଲ୍ଲାରେ ୧୨୨ଟି ସ୍ଥାନରେ ଆଲର୍ଟ ସାଇରନ୍‍ ଟାୱାର ନିର୍ମାଣ ହୋଇଛି । ଏଗୁଡିକ ଆସନ୍ତା ଜୁନ୍‍ ଶେଷସୁଦ୍ଧା କାର୍ଯ୍ୟକ୍ଷମ ପାଇଁ ଲକ୍ଷ୍ୟ ରହିଛି ।

ରାଜସ୍ୱ ଓ ବିପର୍ଯ୍ୟ ପରିଚାଳନା ବିଭାଗର ସଫଳତା ସଂକ୍ରାନ୍ତରେ ସାମ୍ବାଦିକମାନଙ୍କୁ ସୂଚନା ଦେଇ ଏହା କହିଛନ୍ତି ବିଭାଗୀୟ ମନ୍ତ୍ରୀ ମହେଶ୍ୱର ମହାନ୍ତି ।

ମନ୍ତ୍ରୀ କହିଛନ୍ତି ଯେ ପ୍ରାକୃତିକ ବିପର୍ଯ୍ୟୟ ସଂକ୍ରାନ୍ତରେ ଆଗୁଆ ସୂଚନା ମିଳିଲେ ଧନ ଜୀବନ କ୍ଷୟକ୍ଷତିକୁ ରୋକାଯାଇ ପାରିବ । ଏହାକୁ ଦୃଷ୍ଟିରେ ରଖି ୬ଟି ଜିଲ୍ଲାର ୨୨ଟି ବ୍ଲକରେ ଏହି ଆଲର୍ଟ ସାଇରନ୍‍ ଟାୱାର ନିର୍ମାଣ କରାଯାଉଛି ।

ସେହିଭଳି ରାଜ୍ୟରେ ପାଣିପାଗ ସମ୍ପର୍କିତ ସୂଚନା ଆହରଣ ଓ ମରୁଡି ପରିସ୍ଥିତିର ସଠିକ୍‍ ପରିଚାଳନା ନିମନ୍ତେ ରାଜ୍ୟ ମରୁଡି ପର୍ଯ୍ୟବେକ୍ଷଣ କେନ୍ଦ୍ର ଗଠନ କରାଯାଇଛି । ରାଜ୍ୟର ୩୨୦ଟି ସ୍ଥାନରେ ସ୍ୱୟଂଚାଳିତ ପାଣିପାଗ କେନ୍ଦ୍ର ଓ ପ୍ରାୟ ୬ହଜାରଟି ସ୍ଥାନରେ ସ୍ୱୟଂଚାଳିତ ବର୍ଷା ପରିମାପକ ଯନ୍ତ୍ର ସ୍ଥାପନ ନିମନ୍ତେ ପଦକ୍ଷେପ ନିଆଯାଉଛି ।

ରାଜ୍ୟରେ ୮୭୯ ଟି ବହୁମୁଖୀ ବନ୍ୟା ଓ ବାତ୍ୟା ଆଶ୍ରୟସ୍ଥଳୀ ନିର୍ମାଣ ହୋଇଥିବାବେଳେ ଏହିସବୁ ପ୍ରକଳ୍ପକୁ ସଂଯୋଗ ଲାଗି ୩୮୮ କିଲୋମିଟର ସବୁଦିନିଆ ରାସ୍ତା ନିର୍ମାଣ ସହିତ ୫୮ କିଲୋମିଟରର ଲୁଣାବନ୍ଧକୁ ସୁଦୃଢ କରାଯାଇଛି ।

ଓଡିଶା ବିପର୍ଯ୍ୟୟ ପୁନରୁଦ୍ଧାର ପ୍ରକଳ୍ପ ଜରିଆରେ ଫାଇଲିନ୍‍ ବାତ୍ୟାରେ ଅଧିକ କ୍ଷତିଗ୍ରସ୍ତ ଗଞ୍ଜାମ ଓ ଖୋରଧା ଜିଲ୍ଲାର ସମୁଦ୍ର ଉପକୂଳ ଠାରୁ ୫ କିଲୋମିଟର ଅଞ୍ଚଳରେ ମଧ୍ୟରେ ବସବାସ କରୁଥିବା ପରିବାର ପାଇଁ ୧୬,୫୬୮ଟି ବିପର୍ଯ୍ୟୟ ପ୍ରତିରୋଧକ ବାସଗୃହ ନିର୍ମାଣ ହେଉଛି । ଏଥିରୁ ବର୍ତ୍ତମାନ ସୁଦ୍ଧା ୧୫ହଜାର ଘରର ନିର୍ମାଣ ସମ୍ପୂର୍ଣ୍ଣ ହୋଇଥିବା ଓସ୍‍ଡମାର ପରିଚାଳନା ନିର୍ଦ୍ଦେଶକ ବିଷ୍ଣୁପଦ ସେଠୀ ସୂଚନା ଦେଇଛନ୍ତି ।

ଗତବର୍ଷ ମରୁଡି, ରୋଗପୋକ ଉପଦ୍ରବ ଓ ଅଦିନିଆବର୍ଷା ଯୋଗୁଁ ରାଜ୍ୟର ୨୯ଟି ଜିଲ୍ଲାରେ ପ୍ରାୟ ୮ଲକ୍ଷ ୮୨ହଜାର ହେକ୍ଟର ଜମିରେ ଶତକଡା ୩୩ଭାଗରୁ ଅଧିକ ଫସଲ ନଷ୍ଟ ହୋଇଥିବାବେଳେ ଚାଷୀମାନଙ୍କ ସହାୟତା ପାଇଁ ରାଜ୍ୟ ବିପର୍ଯ୍ୟୟ ସହାୟତା ପାଣ୍ଠିରୁ ୭୫୧କୋଟି ଟଙ୍କା ଜିଲ୍ଲାପାଳମାନଙ୍କୁ ଦିଆଯାଇଛି ।