ଅଭିଜିତ ଆୟାର ମିତ୍ରଙ୍କ ମନ୍ତବ୍ୟର ତଦନ୍ତ ଲାଗି ଗୃହ କମିଟି ଗଠିତ   ବିରୋଧୀ ଦଳ ନେତା ନରସିଂହ ମିଶ୍ରଙ୍କ ଅଧ୍ୟକ୍ଷତାରେ ଗଠିତ ଏହି କମିଟିରେ ଅଛନ୍ତି ୫ ବିଧାୟକ  କମିଟି ତାହାର ରିପୋର୍ଟ ଆସନ୍ତା ବିଧାନସଭା ଅଧିବେଶନର ପ୍ରଥମ କିମ୍ବା ଦ୍ୱିତୀୟ ଦିନ ଦେବାକୁ ବାଚସ୍ପତିଙ୍କ ନିର୍ଦ୍ଦେଶ  ବିଧାନସଭାର ମୌସୁମୀ ଅଧିବେଶନ ଶେଷ  ଗୃହକୁ ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ ରଖିଲେ ବାଚସ୍ପତି ପ୍ରଦୀପ ଅମାତ  ସେପ୍ଟେମ୍ବର ୪ରୁ ଆରମ୍ଭ ହୋଇଥିଲା ମୌସୁମୀ ଅଧିବେଶନ  

କେବେ ଲାଗୁ ହେବ ବିଜୱାଡା ମଡେଲ ?

ଅପରାଧିକ ମାମଲାରେ ଓଡିଶାରେ ଦଣ୍ଡବିଧାନ ହାର ଦେଶର ଅନ୍ୟ ରାଜ୍ୟମାନଙ୍କ ତୁଳନାରେ ଢେର କମ୍‍ ରହୁଛି । ଦଣ୍ଡବିଧାନ ହାର ବୃଦ୍ଧି ଲାଗି ୩ବର୍ଷ ତଳେ ରାଜ୍ୟ ସରକାର ବିଜୱାଡା ମଡେଲ ପ୍ରଚଳନପାଇଁ ସ୍ଥିର କରିଥିଲେ ମଧ୍ୟ ତାହା ଏଯାବତ୍‍ କାର୍ଯ୍ୟକାରୀ ହୋଇନାହିଁ ।

ସରକାରୀ ହିସାବ ମୁତାବକ ୨୦୧୭ ରେ ୧,୦୩,୮୬୬ ଅପରାଧିକ ମାମଲା ରୁଜୁ ହୋଇଥିବାବେଳେ ତାହାର ପୂର୍ବ ଦୁଇବର୍ଷରେ ଏହି ସଂଖ୍ୟା ଏକ ଲକ୍ଷ ୩ହଜାରରୁ ବି ଅଧିକକରି ଥିଲା । ରାଜ୍ୟରେ ବର୍ଷକୁ ବର୍ଷ ଧର୍ତ୍ତବ୍ୟ ଅପରାଧମାନ ବଢି ଚାଲିଥିବାବେଳେ ଦଣ୍ଡବିଧାନ ହାର କିନ୍ତୁ ଅତ୍ୟନ୍ତ ନିରୁତ୍ସାହଜନକ ।

ସର୍ବଶେଷ ଜାତୀୟ କ୍ରାଇମ ରେକର୍ଡବ୍ୟୁରୋର ତଥ୍ୟ ଅନୁଯାୟୀ ୨୦୧୬ ବର୍ଷରେ ଓଡିଶାରେ ଆଇପିସି ସଂକ୍ରାନ୍ତୀୟ ମାମଲାରେ ଦଣ୍ଡବିଧାନ ହାର ମାତ୍ର ୧୦.୪ ପ୍ରତିଶତ ଥିବାବେଳେ ଜାତୀୟ ସ୍ତରରେ ଏହା ୪୬.୮ ପ୍ରତିଶତ ଥିଲା । ସେହିଭଳି ରାଜ୍ୟପାଇଁ ଥିବା ସ୍ୱତନ୍ତ୍ର ଆଇନ୍‍ ପରିସରଭୁକ୍ତ ଅପରାଧିକ ମାମଲାରେ ଓଡିଶାରେ ଦଣ୍ଡବିଧାନ ହାର ୧୯.୩ ପ୍ରତିଶତ ଥିବାବେଳେ ଜାତୀୟ ସ୍ତରରେ ଏହା ୮୨.୪ ପ୍ରତିଶତ ଥିଲା ।

ମହିଳା ଓ ଶିଶୁଙ୍କ ପ୍ରତି ଘଟୁଥିବା ଅପରାଧିକ ମାମଲାରେ ୨୦୧୬ବର୍ଷରେ ଓଡିଶାରେ ଦଣ୍ଡବିଧାନ ହାର ଯଥାକ୍ରମେ ୬.୨ ଓ ୯.୨ ପ୍ରତିଶତ ଥିବାବେଳେ ଜାତୀୟ ସ୍ତରରେ ଏହା ୧୮.୯ ଓ ୩୦.୭ ପ୍ରତିଶତ ଥିଲା । ବରିଷ୍ଠ ନାଗରିକଙ୍କ ପ୍ରତି ଅପରାଧିକ ମାମଲା ଓଡିଶାରେ ଦଣ୍ଡବିଧାନ ହାର ମାତ୍ର ୩.୮ ପ୍ରତିଶତ ଥିବାବେଳେ ଜାତୀୟ ସ୍ତରରେ ଏହା ୩୫.୯ ପ୍ରତିଶତ ରହିଥିଲା ।

ଅନୁସୂଚିତ ଜାତି ଓ ଜନଜାତି ଲୋକଙ୍କ ପ୍ରତି ଘଟୁଥିବା ବିଭିନ୍ନ ଅତ୍ୟାଚାର ସମ୍ବନ୍ଧିୟ ଅପରାଧିକ ମାମଲାରେ ଏନ୍‍ସିଆରବି ରିପୋର୍ଟ ଅନୁଯାୟୀ ଓଡିଶାରେ ଦଣ୍ଡବିଧାନ ହାର ଉକ୍ତବର୍ଷରେ ଯଥାକ୍ରମେ ୩.୩ ଓ ୫.୭ ପ୍ରତିଶତ ଥିବାବେଳେ ଜାତୀୟ ସ୍ତରରେ ଏହା ଯଥାକ୍ରମେ ୨୫.୭ ଓ ୨୦.୮ ପ୍ରତିଶତ ଥିଲା । କେବଳ ଭିଜିଲାନ୍ସ ମାମଲାରେ ଓଡିଶାରେ ଦଣ୍ଡବିଧାନ ହାର ଜାତୀୟ ସ୍ତରଠାରୁ ଅଧିକ ରହିଛି ।

ବିଜୱାଡାରେ ଦଣ୍ଡ ବିଧାନ ହାର ହାରାହାରି ୬୦ପ୍ରତିଶତ ଥିବାରୁ ଭୁବନେଶ୍ୱର-କଟକ କମିଶନରେଟ ପୁଲିସ୍‍ରେ ବିଜୱାଡା ମଡେଲ ଚଳାଇବାପାଇଁ ୨୦୧୫ ମସିହାରେ ନିଷ୍ପତ୍ତି ହୋଇଥିଲା । ସେଠାରେ ବିଚାର ସମୟରେ ପ୍ରତି ଥାନାର ଅଧିକାରୀ କୋର୍ଟରେ ଉପସ୍ଥିତ ରହିବା ସହିତ ସାକ୍ଷୀ ଓ ସରକାରୀ ଓକିଲଙ୍କ ସହିତ ସମନ୍ୱୟ ରକ୍ଷା କରିଥାନ୍ତି । ଭୁବନେଶ୍ୱର-କଟକରେ ଅନୁରୂପ ବ୍ୟବସ୍ଥା କରିବା ସହିତ ଥାନାର ଇନ୍ସପେକ୍ଟରମାନେ ଅପରାଧିକ ମାମଲା ଗୁଡିକର ନିୟମିତ ତଦାରଖ କରିବାକଥା ।

ରାଜ୍ୟରେ ଦଣ୍ଡବିଧାନ ହାର କମ୍‍ ରହୁଥିବାରୁ ଖୋଦ୍‍ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଦ୍‍ବେଗପ୍ରକାଶ କରିବା ସହିତ ଏହାର ପ୍ରତିକାର ଲାଗି ଗୃହ ବିଭାଗ ବ୍ୟବସ୍ଥା ଗ୍ରହଣ କରିବାକୁ କହିଆସୁଛନ୍ତି । ଗୃହ ବିଭାଗ ଏ ପରିପ୍ରେକ୍ଷୀରେ ବିଜୱାଡା ମଡେଲ ଲାଗୁ କରିବାପାଇଁ କହିଥିଲେ ମଧ୍ୟ ଏଠାରେ ପୁଲିସ୍‍ ବାହିନୀରେ ବହୁ ପଦ ପଦବୀ ଖାଲି ପଡିଥିବାରୁ ତାହା କାର୍ଯ୍ୟକାରୀ ହୋଇପାରୁନାହିଁ ବୋଲି ବରିଷ୍ଠ ଅଧିକାରୀମାନେ ସ୍ୱୀକାର କରୁଛନ୍ତି । ନିକଟରେ ଗୃହ ବିଭାଗ ଲାଗି ଥିବା ବିଧାନସଭାର ସ୍ଥାୟୀ କମିଟି ବୈଠକରେ ମଧ୍ୟ ଏକଥା ଉଠିଛି । (ତଥ୍ୟ)