ଗୋଟିଏ ଦିନରେ କରୋନାରେ ରେକର୍ଡ ୧୩ ମୃତ  ରାଜ୍ୟରେ ମୋଟ୍‍ କରୋନା ମୃତ୍ୟୁସଂଖ୍ୟା ୨୭୨  ଗଞ୍ଜାମରେ ସର୍ବାଧିକ ୬ଜଣ ମୃତ  ୪୬ହଜାର ଛୁଇଁଲା କରୋନା ଆକ୍ରାନ୍ତଙ୍କ ତାଲିକା  ଗୋଟିଏ ଦିନର ୨୯ ଜିଲ୍ଲାରୁ ୧୭୩୪ ନୂଆ ଆକ୍ରାନ୍ତ ଚିହ୍ନଟ  ମୋଟ ଆକ୍ରାନ୍ତଙ୍କ ସଂଖ୍ୟା ୪୫,୯୨୭  ଖୋରଧାରେ ସର୍ବାଧିକ ୩୪୨ ଆକ୍ରାନ୍ତ ଚିହ୍ନଟ  ଗଞ୍ଜାମରେ ୨୨୨, କଟକରେ ୧୭୭, ସୁନ୍ଦରଗଡରେ ୧୨୬ ଓ ନୟାଗଡରେ ୧୦୬ ଚିହ୍ନଟ  

ହସ୍ତକ୍ଷେପ କଲେ ଧର୍ମେନ୍ଦ୍ର

ଶେଷରେ କେନ୍ଦ୍ର ଇସ୍ପାତ, ପେଟ୍ରୋଲିୟମ ଓ ପ୍ରାକୃତିକ ବାଷ୍ପ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଋଗଣ ହୋଇ ପଡୁଥିବା ରାଷ୍ଟ୍ରାୟତ ସଂସ୍ଥା ନୀଳାଚଳ ଇସ୍ପାତ ବ୍ୟାପାରରେ ହସ୍ତକ୍ଷେପ କରିଛନ୍ତି । ଶ୍ରୀ ପ୍ରଧାନ ଏହି ପ୍ରସଙ୍ଗକୁ କେନ୍ଦ୍ର ବାଣିଜ୍ୟ, ଶିଳ୍ପ ଓ ରେଳବାଇ ମନ୍ତ୍ରୀ ପୀୟୁଷ ଗୋଏଲଙ୍କ ନିକଟରେ ଉପସ୍ଥାପନ କରିଛନ୍ତି । ଶ୍ରୀ ଗୋଏଲ ଆସନ୍ତା ୧୦ ତାରିଖରେ ନୀଳାଚଳ ଇସ୍ପାତ ସମସ୍ୟାର ସମାଧାନ ପାଇଁ ଏକ ଉଚ୍ଚସ୍ତରୀୟ ବୈଠକରେ ଅଧ୍ୟକ୍ଷତା କରିବେ ।

କେନ୍ଦ୍ର ଇସ୍ପାତ ମନ୍ତ୍ରୀ ଶ୍ରୀ ପ୍ରଧାନ ଦେଶର ପୂର୍ବାଞ୍ଚଳରେ ଇସ୍ପାତକୁ ନେଇ ପୂର୍ବୋଦୟ ଯୋଜନା ପ୍ରସ୍ତୁତ କରିଥିବାବେଳେ କଳିଙ୍ଗନଗରରେ ଥିବା ନୀଳାଚଳ ଇସ୍ପାତ ପାଇଁ ବ୍ୟାପକ ସୁଯୋଗ ରହିଛି । ଏଠାରେ ଉଲ୍ଲେଖନୀୟ ଯେ କଳିଙ୍ଗନଗର ଠାରେ ଖୁବ୍‍ଶୀଘ୍ର ଦେଶର ପ୍ରଥମ ଇସ୍ପାତ ହବ୍‍ ପ୍ରତିଷ୍ଠା ହେବାକୁ ଯାଉଛି । କେନ୍ଦ୍ର ସରକାର ଯେକୌଣସି ପ୍ରକାରେ ନୀଳାଚଳ ଇସ୍ପାତରୁ ପୁଞ୍ଜି ପ୍ରତ୍ୟାହାର ନିଷ୍ପତ୍ତି ଗ୍ରହଣ କରିଥିବାବେଳେ ଏହାକୁ ଉଦ୍ଧାର ପାଇଁ ଷ୍ଟିଲ ଅଥରିଟୀ ଅଫ୍‍ ଇଣ୍ଡିଆ ଲିମିଟେଡ (ସେଲ୍‍), ରାଷ୍ଟ୍ରୀୟ ଇସ୍ପାତ ନିଗମ ଲିମିଟେଡ (ଆଇଆଇଏନ୍‍ଏଲ୍‍) ଓ ଜାତୀୟ ଖଣିଜ ଉନ୍ନୟନ ନିଗମ (ଏନ୍‍ଏମ୍‍ଡିସି) ସପକ୍ଷରେ ନୀଳାଚଳ ଇସ୍ପାତର କର୍ମଚାରୀ ଓ ଅଧିକାରୀମାନେ ଅଛନ୍ତି ।

ନୀଳାଚଳ ଇସ୍ପାତର କର୍ମଚାରୀ ଓ ଅଧିକାରୀମାନେ ବାରମ୍ବାର କେନ୍ଦ୍ର ସରକାରଙ୍କ ଦୃଷ୍ଟି ଆକର୍ଷଣ କରିବା ସହିତ କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନଙ୍କୁ ଅନୁରୋଧ କରି ନିଗମରେ ଥିବା ଏମ୍‍ଏମ୍‍ଟିସିର ଅଂଶଧନକୁ ଆରଆଇଏନ୍‍ଏଲ୍‍, ସେଲ୍‍ କିମ୍ବା ଏନ୍‍ଏମ୍‍ଡିସି ଅଧିଗ୍ରହଣ କରିବାକୁ ପଦକ୍ଷେପ ନେବାଲାଗି ଅନୁରୋଧ କରିଛନ୍ତି । ନୀଳାଚଳ ଇସ୍ପାତର ପ୍ରମୁଖ ଅଂଶୀଦାର ଥିବା ଏମ୍‍ଏମ୍‍ଟିସି ଆର୍ଥିକ ସଙ୍କଟର ସମ୍ମୁଖୀନ ହୋଇଥିବାବେଳେ ଏହି କାରଖାନାରେ ଆଉ ଅଧିକ ଅର୍ଥ ଖଟାଇବାକୁ ଚାହୁଁନାହିଁ । ଯେହେତୁ ଏମ୍‍ଏମ୍‍ଟିସି ଅର୍ଥ ଦେବାକୁ ଚାହୁଁନାହିଁ ତେଣୁ ଏହାର ଅଂଶଧନକୁ କୌଣସି ରାଷ୍ଟ୍ରାୟତ ସଂସ୍ଥାକୁ ନୀଳାଚଳ ଇସ୍ପାତ କେନ୍ଦ୍ରୀୟ ରାଷ୍ଟ୍ରାୟତ ଉଦ୍ୟୋଗ ତାଲିକାକୁ ଆସିପାରିବ ବୋଲି ଅଧିକାରୀମାନେ କହିଛନ୍ତି ।

ପୁଞ୍ଜି ପ୍ରତ୍ୟାହାର ପାଇଁ ଅଧିକ ସମୟ ଲାଗୁଥିବାରୁ କାରଖାନା ଚଳାଇବାକୁ ଅନୁମତି ଦିଆନଗଲେ ଏହାର ଅଂଶଧନର ମୂଲ୍ୟ ହ୍ରାସ ପାଇବ ଏବଂ ଅଂଶଧନଧାରୀମାନେ ଆଶା ଠାରୁ କମ୍‍ ପରିମାଣର ଅର୍ଥ ପାଇବେ । ତେଣୁ ନୀଳାଚଳ ଇସ୍ପାତ ପ୍ରସଙ୍ଗରେ ଆଲୋଚନା ସମୟରେ ଏହାକୁ ଚଳାଇବାକୁ ଅଗ୍ରାଧିକାର ଦିଆଯିବା ଆବଶ୍ୟକ । କେନ୍ଦ୍ରମନ୍ତ୍ରୀ ପୀୟୁଷ ଗୋଏଲଙ୍କ ଅଧ୍ୟକ୍ଷତାରେ ହେବାକୁ ଥିବା ଆଲୋଚନାରେ ଶ୍ରୀ ପ୍ରଧାନ ଏ କ୍ଷେତ୍ରରେ ପ୍ରମୁଖ ଭୂମିକା ନିର୍ବାହ କରିବେ ବୋଲି ଅଧିକାରୀମାନେ ଆଶା ବାନ୍ଧିଛନ୍ତି ।

ନୀଳାଚଳ ଇସ୍ପାତକୁ ଉଦ୍ଧାର ପାଇଁ ରାଜ୍ୟ ସରକାର ଆଗେଇ ଆସିବା ସହିତ ଏହାର ଋଣ ପରିଶୋଧ ଲାଗି ଅର୍ଥ ଯୋଗାଇ ଦେଉଛନ୍ତି । ମୁଖ୍ୟ ଶାସନ ସଚିବ ଅସିତ ତ୍ରିପାଠୀ ଏହି ପ୍ରସଙ୍ଗକୁ କେନ୍ଦ୍ର ସରକାରଙ୍କ ନିକଟରେ ଉପସ୍ଥାପନ କରିଥିବାବେଳେ ରାଷ୍ଟ୍ରାୟତ ସଂସ୍ଥା ଓଡିଶା ଖଣି ନିଗମ (ଓଏମ୍‍ସି) ଅର୍ଥ ଯୋଗାଇ ଦେଇଛି । ସ୍ଥିତି ଦିନକୁ ଦିନ ବିଗୁଡୁଥିବାରୁ କେନ୍ଦ୍ର ସରକାର ଏ ଦିଗରେ ଚୂଡାନ୍ତ ନିଷ୍ପତ୍ତି ଗ୍ରହଣ କଲେ ବାର୍ଷିକ ୧୦ ଲକ୍ଷ ଟନ୍‍ ଇସ୍ପାତ ଉତ୍ପାଦନ ଲକ୍ଷ୍ୟ ରଖିଥିବା ନୀଳାଚଳ ଇସ୍ପାତ ତାହାର ଲକ୍ଷ୍ୟ ପୂରଣରେ ସମର୍ଥ ହେବ ।

ତେଣୁ ଅଗଷ୍ଟ ୧୦ ତାରିଖରେ ବସିବାକୁ ଥିବା ବୈଠକରେ ନୀଳାଚଳ ଇସ୍ପାତ ପାଇଁ ଅତି ଗୁରୁତ୍ୱପୂର୍ଣ୍ଣ ଥିବାବେଳେ ଏଥିରେ ବାଣିଜ୍ୟ, ଇସ୍ପାତ ଓ ଅର୍ଥ ମନ୍ତ୍ରାଳୟ ସହିତ ଓଡିଶା ସରକାରଙ୍କ ଅଧିକାରୀମାନେ ଯୋଗଦେବାର ସୂଚନା ମିଳୁଛି । ଯେହେତୁ କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ ଏହି ପ୍ରସଙ୍ଗରେ ହସ୍ତକ୍ଷେପ କରିଛନ୍ତି ତେଣୁ ନୀଳାଚଳ ଇସ୍ପାତର କର୍ମଚାରୀ ଓ ଅଧିକାରୀଙ୍କ ମଧ୍ୟରେ ଭବିଷ୍ୟତକୁ ନେଇ ଆଶାର କିରଣ ଦେଖାଦେଇଛି । (ତଥ୍ୟ) 



ସମ୍ପାଦକ: ବ୍ରଜ କିଶୋର ମିଶ୍ର

©Tathya Media Pvt. Ltd. 2020