ଗୋଟିଏ ଦିନରେ କରୋନା ନେଲା ୫ ମୁଣ୍ଡ  ମୋଟ କରୋନା ମୃତ୍ୟୁସଂଖ୍ୟା ୩୪ ହେଲା  ମୃତକଙ୍କ ମଧ୍ୟରେ ଗଞ୍ଜାମରୁ ୩ ଓ ଖୋରଧାରୁ ୨ଜଣ  ରାଜ୍ୟରେ ୪୯୫ କରୋନା ଆକ୍ରାନ୍ତ ଚିହ୍ନଟ  ଆକ୍ରାନ୍ତଙ୍କ ମଧ୍ୟରୁ ୧୪୦ ଜଣ ସ୍ଥାନୀୟ ସଂକ୍ରମିତ  ସର୍ବାଧିକ ୨୧୬ ଆକ୍ରାନ୍ତ ଗଞ୍ଜାମରୁ ଚିହ୍ନଟ  

ରାଜ୍ୟରେ ବଢ଼ୁଛି କରୋନା ସଂକ୍ରମଣ

ପ୍ରଥମ ପର୍ଯ୍ୟାୟ ଲକ୍‍ଡାଉନଠାରୁ ଦ୍ୱିତୀୟ ଅନଲକ୍‍ ଭିତରେ ଦେଶରେ ତଥା ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା କମିବା ପରିବର୍ତ୍ତେ ଢେର୍‍ ବଢ଼ିଛି । ଯେଉଁଭଳି ଅମାନିଆ ଢଙ୍ଗରେ କରୋନାର ପରିସଂଖ୍ୟା ଗ୍ରାଫ୍‍ ଉପରକୁ ଉଠୁଛି ସେଥିରୁ ଜୁଲାଇ ଶେଷ ବେଳକୁ ଦେଶରେ କରୋନା ଆକ୍ରାନ୍ତଙ୍କ ସଂଖ୍ୟା ୧୦ ଲକ୍ଷ ଓ ରାଜ୍ୟରେ ୧୫ହଜାରରୁ ଅଧିକ ହେବା ଘେନି ବିଶେଷଜ୍ଞମାନେ ଆଶଙ୍କାବ୍ୟକ୍ତ କରୁଛନ୍ତି ।

ଓଡ଼ିଶାରେ ପ୍ରଥମ କରୋନା ଆକ୍ରାନ୍ତ ଗତ ମାର୍ଚ୍ଚ ୧୫ ତାରିଖରେ ଚିହ୍ନିତ ହୋଇଥିବା ବେଳେ ଦେଶର ପ୍ରଥମ କରୋନା ଆକ୍ରାନ୍ତ କେରଳରେ ଗତ ଜାନୁଆରୀ ୩୦ ତାରିଖରେ ଧରାପଡ଼ିଥିଲା । ସମଗ୍ର ବିଶ୍ୱରେ କରୋନା ତାହାର କରାଳକାୟା ବିସ୍ତାର କରିବ ବୋଲି ବିଶେଷଜ୍ଞମାନଙ୍କ ସତର୍କବାଣୀ ପରିପ୍ରେକ୍ଷୀରେ ଭାରତ ସରକାର ଗତ ମାର୍ଚ୍ଚ ୨୪ ତାରିଖରେ ପ୍ରଥମ ପର୍ଯ୍ୟାୟ ଲକ୍‍ଡାଉନ ଘୋଷଣା କରିଥିଲେ । ସେତେବେଳକୁ ଆମ ଦେଶରେ ମୋଟ୍‍ କରୋନା ସଂକ୍ରମିତଙ୍କ ସଂଖ୍ୟା ୫୩୬ ଥିବା ବେଳେ ମୃତ୍ୟୁସଂଖ୍ୟା ୧୦ରେ ସୀମିତ ଥିଲା । ସେହିପରି ଏହି ଦିନ ସୁଦ୍ଧା ଓଡ଼ିଶାରେ ମାତ୍ର ଦୁଇ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ଜଣେ ହେଲେ କେହି ମରିନଥିଲେ ।

ଇତିମଧ୍ୟରେ ଏପ୍ରିଲ ୧୫ରେ ଦ୍ୱିତୀୟ ପର୍ଯ୍ୟାୟ, ମଇ ୪ରୁ ତୃତୀୟ ପର୍ଯ୍ୟାୟ ଓ ମଇ ୧୮ ତାରିଖରୁ ଚତୁର୍ଥ ପର୍ଯ୍ୟାୟ ଲକ୍‍ଡାଉନ ଘୋଷଣା କରାଯାଇଥିଲା । ଗତ ଜୁନ୍‍ ପହିଲାରେ ପ୍ରଥମ ପର୍ଯ୍ୟାୟ ଅନଲକ୍‍ ଲାଗୁ ହୋଇଥିବା ବେଳେ ଦ୍ୱିତୀୟ ପର୍ଯ୍ୟାୟ ଅନଲକ୍‍ ଜୁଲାଇ ପହିଲାରୁ ଆରମ୍ଭ ହେଉଛି ।

ଆଜି(ଜୁନ୍‍ ୩୦) ସୁଦ୍ଧା ସମଗ୍ର ବିଶ୍ୱରେ ୧ କୋଟି ୪ ଲକ୍ଷରୁ ଊଦ୍ଧ୍ୱର୍ କରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ଏହି ମହାମାରୀ ୫ ଲକ୍ଷ ୯ ହଜାରରୁ ଅଧିକ ମୁଣ୍ଡ ନେଇସାରିଲାଣି । ଏବେ ଅନ୍ୟୁନ ୪୩ଲକ୍ଷ ଲୋକ ବିଭିନ୍ନ ଦେଶରେ କରୋନାରୁ ମୁକ୍ତି ପାଇଁ ଚିକିତ୍ସିତ ହେଉଥିବା ବେଳେ ସୌଭାଗ୍ୟବଶତଃ ପ୍ରାୟ ୫୭ ଲକ୍ଷ ଲୋକ କରୋନରୁ ସୁସ୍ଥ ହୋଇଛନ୍ତି । ଆମେରିକା, ଇଂଲଣ୍ଡ, ଫ୍ରାନ୍ସ, ଇଟାଲୀ, ଜର୍ମାନୀ, ରୁଷ ଭଳି ବହୁ ପ୍ରଗତିଶୀଳ ଦେଶ କରୋନା କବଳରେ କଲବଲ ହେଉଥିବା ବେଳେ ଏହାର ଏନ୍ତୁଡ଼ିଶାଳ ଚୀନ୍‍ରେ ବି ହଜାର ହଜାର ଲୋକ ମରିଛନ୍ତି ।

ଭାରତ ସରକାରଙ୍କ ତଥ୍ୟ ଅନୁଯାୟୀ ଆଜିସୁଦ୍ଧା ଆମ ଦେଶରେ ପ୍ରାୟ ୫ ଲକ୍ଷ ୭୦ ହଜାର କରୋନା ସଂକ୍ରମିତ ଚିହ୍ନଟ ହୋଇଥିବା ବେଳେ ଏମାନଙ୍କ ମଧ୍ୟରୁ ପାଖାପାଖି ୩ଲକ୍ଷ ୩୬ ହଜାର ସୁସ୍ଥ ହୋଇଛନ୍ତି ଏବଂ ୧୭ ହଜାରରୁ ଅଧିକ ମୁଣ୍ଡ କରୋନା ଆମ ଦେଶରେ ନେଇସାରିଲାଣି ।

ପ୍ରଥମ ପର୍ଯ୍ୟାୟ ଲକ୍‍ଡାଉନ ବେଳକୁ ମାର୍ଚ୍ଚ ମାସରେ ଓଡ଼ିଶାରେ ମାତ୍ର ୨ ଜଣ କରୋନା ସଂକ୍ରମିତ ଥିବା ବେଳେ ରାଜ୍ୟ ସରକାରଙ୍କ ପ୍ରଦତ୍ତ ହିସାବ ଅନୁସାରେ ଆଜିସୁଦ୍ଧା ମୋଟ୍‍ କରୋନା ଆକ୍ରାନ୍ତଙ୍କ ସଂଖ୍ୟା ୭୦୬୫ରେ ପହଞ୍ଚିଛି । ତେବେ ଓଡ଼ିଶାରେ ୪୯୪୬ ଜଣ କରୋନାରୁ ମୁକ୍ତି ପାଇଥିବା ବେଳେ ଆଜିର ଦିନରେ ୨ ଲକ୍ଷ ୮୭ହଜାର ଜଣ କରୋନା ରୋଗୀ ରାଜ୍ୟର ବିଭିନ୍ନ କୋଭିଡ୍‍ ହସ୍ପିଟାଲରେ ଚିକିତ୍ସିତ ହେଉଛନ୍ତି ।

ମାର୍ଚ୍ଚ ମାସ ବେଳକୁ କରୋନା ସଂକ୍ରମଣ ତାଲିକାରେ ଭାରତର ସ୍ଥାନ ୩୫ ତଳକୁ ଥିବା ବେଳେ ଏବେ ଚୀନ୍‍, ଇଟାଲୀ, ଫ୍ରାନ୍ସ, ଇଂଲଣ୍ଡ ଆଦିଙ୍କୁ ପଛରେ ପକାଇ ଭାରତ ଚତୁର୍ଥ ସ୍ଥାନରେ ପହଞ୍ଚିଛି । ଯେଉଁଭଳି ଭାବରେ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ୁଛି ତାହା ଅବ୍ୟାହତ ରହିଲେ ୧୫ ଦିନ ଭିତରେ ଭାରତ ରୁଷିଆକୁ ପଛରେ ପକାଇ ତୃତୀୟ ସ୍ଥାନରେ ପହଞ୍ଚିଯିବା ଆଶଙ୍କା କରାଯାଉଛି । ଗୋଟିଏ ପଟେ କରୋନା ସଂକ୍ରମଣ ମୁଣ୍ଡ ନେଇ ଚାଲୁଥିବା ବେଳେ ଅନ୍ୟପଟେ ଆର୍ଥିକ ବ୍ୟବସ୍ଥା ଭୁଷୁଡ଼ିବାରେ ଲାଗିଛି ।  



ସମ୍ପାଦକ: ବ୍ରଜ କିଶୋର ମିଶ୍ର

©Tathya Media Pvt. Ltd. 2020