ଅଭିଜିତ ଆୟାର ମିତ୍ରଙ୍କ ମନ୍ତବ୍ୟର ତଦନ୍ତ ଲାଗି ଗୃହ କମିଟି ଗଠିତ   ବିରୋଧୀ ଦଳ ନେତା ନରସିଂହ ମିଶ୍ରଙ୍କ ଅଧ୍ୟକ୍ଷତାରେ ଗଠିତ ଏହି କମିଟିରେ ଅଛନ୍ତି ୫ ବିଧାୟକ  କମିଟି ତାହାର ରିପୋର୍ଟ ଆସନ୍ତା ବିଧାନସଭା ଅଧିବେଶନର ପ୍ରଥମ କିମ୍ବା ଦ୍ୱିତୀୟ ଦିନ ଦେବାକୁ ବାଚସ୍ପତିଙ୍କ ନିର୍ଦ୍ଦେଶ  ବିଧାନସଭାର ମୌସୁମୀ ଅଧିବେଶନ ଶେଷ  ଗୃହକୁ ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ ରଖିଲେ ବାଚସ୍ପତି ପ୍ରଦୀପ ଅମାତ  ସେପ୍ଟେମ୍ବର ୪ରୁ ଆରମ୍ଭ ହୋଇଥିଲା ମୌସୁମୀ ଅଧିବେଶନ  

ସବୁ ଥାନାରେ ବ୍ରିଦ୍‍ ଆନାଲାଇଜର୍ସ

ମଦୁଆ ଗାଡ଼ିଚାଳକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଲାଗି ଚଳିତ ବର୍ଷ ରାଜ୍ୟର ସମସ୍ତ ଥାନାକୁ ‘ବ୍ରିଦ୍‍ ଆନାଲାଇଜର୍ସ’ ଯୋଗାଇ ଦିଆଯିବ । ସଡ଼କ ଦୁର୍ଘଟଣାରେ ମୃତ୍ୟୁସଂଖ୍ୟା ରୋକିବା ଲାଗି ପରିବହନ ଓ ପୋଲିସ ଅଧିକାରୀ ଗୁରୁତ୍ୱାରୋପ କରୁଥିବା ବେଳେ ଏବେ ଏଭଳି ପଦକ୍ଷେପ ନେବାକୁ ନିଷ୍ପତ୍ତି ହୋଇଛି ।

ବର୍ତ୍ତମାନ ପୋଲିସକୁ ୨୫୪ଟି ବ୍ରିଦ୍‍ ଆନାଲାଇଜର୍ସ ଦିଆଯାଇଥିବା ବେଳେ ଆଉ କିଛି ମାସ ମଧ୍ୟରେ ଅବଶିଷ୍ଟ ମିଳିିବ । ଚଳିତ ମାସ ୧୦ ତାରିଖ ଦିନ ସଡ଼କ ସୁରକ୍ଷା ସଂକ୍ରାନ୍ତରେ ରାଜ୍ୟ ସରକାର ସୁପ୍ରିମ୍‍କୋର୍ଟଙ୍କ ନିକଟରେ ତଥ୍ୟ ଉପସ୍ଥାପନ କରିଛନ୍ତି । ଏଥିରେ ୨୦୧୭ ମସିହାରେ ରାଜ୍ୟର ୯ଟି ଜିଲ୍ଲାରେ ଦୁର୍ଘଟଣାଜନିତ ମୃତ୍ୟୁ ସଂଖ୍ୟା ବଢ଼ିଥିବା ବେଳେ ଅଧିକାରୀମାନଙ୍କ ତ୍ୱରିତ କାର୍ଯ୍ୟାନୁଷ୍ଠାନ ଯୋଗୁ ଏହା ୫ଟି ଜିଲ୍ଲାକୁ ହ୍ରାସ ପାଇଥିବା ଦର୍ଶାଯାଇଛି । ମୁଖ୍ୟ ଶାସନ ସଚିବ ଆଦିତ୍ୟ ପ୍ରସାଦ ପାଢ଼ୀ ରାଜ୍ୟ ସରକାରଙ୍କ ତରଫରୁ ସୁପ୍ରିମ୍‍କୋର୍ଟଙ୍କ ନିକଟରେ ଏହି ତଥ୍ୟ ଉପସ୍ଥାପନ କରିଛନ୍ତି ।

୨୦୧୭ ମସିହାରେ ମୃତାହତଙ୍କ ସଂଖ୍ୟା ପୂର୍ବ ବର୍ଷ ତୁଳନାରେ ୭.୩ ପ୍ରତିଶତ ବଢ଼ିଛି । ରାଜ୍ୟର ୯ଟି ଜିଲ୍ଲା ଯଥା- ସୁନ୍ଦରଗଡ଼, କେନ୍ଦୁଝର, ଖୋର୍ଦ୍ଧା, ସମ୍ବଲପୁର, ବାଲେଶ୍ୱର, ଯାଜପୁର, କୋରାପୁଟ, ବଲାଙ୍ଗୀର ଏବଂ ମୟୂରଭଞ୍ଜରେ ଏହା ବୃଦ୍ଧି ପାଇଛି । ପରିବହନ ଏବଂ ପୋଲିସ ଅଧିକାରୀଙ୍କ ତ୍ୱରିତ ପଦକ୍ଷେପ ଯୋଗୁ ମୃତାହତଙ୍କ ସଂଖ୍ୟା ୫ଟି ଜିଲ୍ଲାରେ ୭ ପ୍ରତିଶତ ହ୍ରାସ ପାଇଥିବା ବେଳେ ମୟୂରଭଞ୍ଜ ଜିଲ୍ଲାରେ ଏହା ରେକର୍ଡ ପରିମାଣ ୨୪ ପ୍ରତିଶତ କମିଛି ।

ଚଳିତ ବର୍ଷ ଏପ୍ରିଲ୍‍ ମାସରୁ ଯାନବାହନ ଅପରାଧ ନିୟନ୍ତ୍ରଣ କ୍ଷମତା ରାଜ୍ୟରେ ଗ୍ରାମାଞ୍ଚଳ ପୋଲିସକୁ ଦିଆଯାଇଛି । ଟ୍ରାଫିକ୍‍ ନିୟମ ବଳରେ ଚଳିତ ବର୍ଷ ମଇ ମାସରେ ୧ଲକ୍ଷ ୧୦ ହଜାରରୁ ଊଦ୍ଧ୍ୱର୍ ଲୋକ ବିନା ହେଲ୍‍ମେଟ୍‍ରେ ଗାଡ଼ି ଚଳାଇ ପୋଲିସ ହାତରେ ଧରାପଡ଼ିଛନ୍ତି । ପୋଲିସକୁ ଏହି କ୍ଷମତା ମିଳିବା ପରେ ସମଗ୍ର ରାଜ୍ୟରେ ମଇ ମାସରେ ୧ ଲକ୍ଷ ୩୩ ହଜାର ଉଲ୍ଲଙ୍ଘନକାରୀଙ୍କ ବିରୋଧରେ ମାମଲା ରୁଜୁ ହୋଇଛି । ପ୍ରତି ମାସରେ ମୁଖ୍ୟ ଶାସନ ସଚିବ ଏ ସଂକ୍ରାନ୍ତରେ ସମୀକ୍ଷା କରୁଥିବାରୁ ସଡ଼କ ସୁରକ୍ଷା ଦାୟିତ୍ୱରେ ଥିବା ସଂସ୍ଥା ଓ ପୋଲିସ ମଧ୍ୟରେ ଅଧିକ ସମନ୍ୱୟ ରକ୍ଷା କରାଯାଇପାରୁଛି ।

ଚଳିତ ବର୍ଷ ଏପ୍ରିଲ୍‍ ଓ ମଇ ମାସରେ ଟ୍ରାଫିକ୍‍ ନିୟମ ଉଲ୍ଲଙ୍ଘନ ଅଭିଯୋଗରେ ୬୨୦୦ ଡ୍ରାଇଭିଂ ଲାଇସେନ୍ସକୁ ନିଲମ୍ବନ କରାଯାଇଥିବା ବେଳେ ଗତବର୍ଷ ହାରାହାରି ଭାବେ ୪୦୦୦ଟି ଡ୍ରାଇଭିଂ ଲାଇସେନ୍ସକୁ ବାତିଲ କରାଯାଇଥିଲା । ରାଜପଥ ପାଟ୍ରୋଲିଂକୁ ମଞ୍ଜୁରୀ ମିଳିଥିବା ବେଳେ ପ୍ରଥମ ପର୍ଯ୍ୟାୟରେ ୫ଟି ସମ୍ବେଦନଶୀଳ ସ୍ଥାନ ଉପରେ ନଜର ରଖାଯାଇଛି ।

ଏଠାରେ ୨୦ ପ୍ରତିଶତରୁ ଅଧିକ ଦୁର୍ଘଟଣାଜନିତ ମୃତ୍ୟୁ ଘଟୁଛି । ରାଜ୍ୟ ସରକାର ରାଜପଥର କେତେକ ସ୍ଥାନକୁ ବ୍ଲାକ୍‍ ସ୍ପଟ୍‍ ଭାବେ ଚିହ୍ନିତ କରିଥିବା ବେଳେ ଏଠାରେ ସ୍ଥିତି ସୁଧାରିବା ପାଇଁ ପଦକ୍ଷେପ ନିଆଯାଉଛି । ୧୧,୬୫୫ କିମି ଦୈର୍ଘ୍ୟ ସଡ଼କର ସୁରକ୍ଷା ଅଡିଟ୍‍ ବି ହୋଇଛି ।

ଟ୍ରାଫିକ୍‍ ନିୟମ ଉଲ୍ଲଙ୍ଘନକାରୀଙ୍କ ଠାରୁ ଆଦାୟ ହେଉଥିବା ଜରିମାନାରୁ ୨୦ ପ୍ରତିଶତ ରାଜ୍ୟ ସରକାର ଗଠନ କରିଥିବା ସଡ଼କ ସୁରକ୍ଷା ପାଣ୍ଠିକୁ ଯାଉଥିବା ବେଳେ ୨୦୧୭-୧୮ ବର୍ଷରେ ଏହି ପାଣ୍ଠିକୁ ୪୦ କୋଟି ଟଙ୍କା ଯୋଗାଇ ଦିଆଯାଇଛି ।

ଅଜଣା ଗାଡ଼ି ଦୁର୍ଘଟଣାରେ ମୃତ୍ୟୁବରଣ କରୁଥିବା ଲୋକଙ୍କୁ ୨ ଲକ୍ଷ ଟଙ୍କା ଓ ଗୁରୁତର ଆହତଙ୍କୁ ୫୦ ହଜାର ଟଙ୍କାର ସହାୟତା ଦେବା ପାଇଁ ରାଜ୍ୟ ସରକାର ସୋଲାଟିୟମ୍‍ ପାଣ୍ଠି ଗଠନ କରିଛନ୍ତି । ଏହି ଅର୍ଥ ମୃତାହତଙ୍କ ନିକଟ ସମ୍ପର୍କୀୟଙ୍କୁ ମୁଖ୍ୟମନ୍ତ୍ରୀଙ୍କ ରିଲିଫ୍‍ ପାଣ୍ଠିରୁ ଯୋଗାଇ ଦିଆଯାଉଛି । ତେଣୁ ସୁପ୍ରିମ୍‍କୋର୍ଟଙ୍କ ନିର୍ଦ୍ଦେଶାନୁଯାୟୀ ରାଜ୍ୟ ସରକାର ସଡ଼କ ସୁରକ୍ଷା କ୍ଷେତ୍ରରେ ସମସ୍ତ ପଦକ୍ଷେପ ଗ୍ରହଣ କରି ଦୁର୍ଘଟଣାଜନିତ ମୃତ୍ୟୁ ସଂଖ୍ୟା ହ୍ରାସ କରିବାରେ ସଫଳ ହୋଇଥିବା ଦର୍ଶାଇଛନ୍ତି ।