ମିଳୁନି ଧାନ ବିହନ

କଳାହାଣ୍ଡି ଜିଲ୍ଲାରେ ବର୍ଷାର ଅଭାବରେ ସର୍ବୋପରି ଇନ୍ଦ୍ରାବତୀରେ ଜଳାଭାବ ହେତୁ କେନାଲ ପାଣି ଯୋଗାଣରେ ବ୍ୟାଘାତ ଦେଖାଦେଇଛି । ତା’ ସାଙ୍ଗକୁ ଜିଲ୍ଲା ସାରା ଧାନ ବିହନର କୃତ୍ରିମ ଅଭାବ ଚାଷୀ ସମସ୍ୟାକୁ ଦ୍ୱିଗୁଣିତ କରିଦେଇଛି ।

ଇନ୍ଦ୍ରାବତୀ ଜଳସେଚନ ବ୍ୟବସ୍ଥା ଆରମ୍ଭ ହେବା ପୂର୍ବରୁ କଳାହାଣ୍ଡିର ଚାଷୀ ଖରିଫ ଋତୁରେ ଧାନ ଅମଳ ହେଲେ ଆଗାମୀ ଋତୁ ପାଇଁ ଆବଶ୍ୟକୀୟ ବିହନ ପ୍ରସ୍ତୃତ କରି ରଖିବା ଏକ ପ୍ରାଚୀନ ପରମ୍ପରା ଥିଲା । ହେଲେ ଇନ୍ଦ୍ରାବତୀରୁ ଜଳସେଚନ ବ୍ୟବସ୍ଥା ହେବା ପରେ ଦୁଇଫସଲି ଚାଷ ଆରମ୍ଭ ହେଲା ଓ ଏହା ପରଠାରୁ ଚାଷୀ ନିଜସ୍ୱ ବିହନ ରଖିବା ସମ୍ଭବପର ହୋଇପାରୁନାହିଁ ।

ଅନ୍ୟପକ୍ଷରେ ଚଳିତ ଖରିଫ ଚାଷ ପାଇଁ ବର୍ଷା ଦାଉ ସାଧିଥିବା ବେଳେ ଚାଷୀଙ୍କୁ ଆବଶ୍ୟକ ପରିମାଣରେ ଧାନ ବିହନ ମିଳିପାରୁନଥିବାର ଅଭିଯୋଗ ହେଉଛି । ସରକାର କୃଷି ବିଭାଗ ଜରିଆରେ ସମବାୟ ସମିତି ଦ୍ୱାରା ଧାନ ବିହନ ଯୋଗଇବାର ବ୍ୟବସ୍ଥା କରିଛନ୍ତି । ଆବଶ୍ୟକ ପରିମାଣର ଧାନ ବିହନ ମିଳିପାରୁନଥିବାରୁ ଚାଷୀ ମହଲରେ ଅସନ୍ତୋଷ ଲାଗି ରହିଛି ।

ସରକାର ଓଡିଶା ରାଜ୍ୟ ବିହନ ନିଗମ ଦ୍ୱାରା ପ୍ରତି ଜିଲ୍ଲାକୁ ଆବଶ୍ୟକ ପରିମାଣରେ ଧାନ ବିହନ ନିଗମର ନିଯୁକ୍ତ ପ୍ରାପ୍ତ ବିହନ ବିକ୍ରୟ କେନ୍ଦ୍ର ମାଧ୍ୟମରେ ଯୋଗାଇ ଆସୁଥିଲେ । ଗତବର୍ଷ ଠାରୁ ଓଡିଶା ରାଜ୍ୟ ବିହନ ନିଗମର ପ୍ରାଧିକାରୀ ସଂସ୍ଥା ଭାବେ ସମସ୍ତ ସମବାୟ ସମିତିଗୁଡିକ ମାଧ୍ୟମରେ ଧାନ ବିହନ ଯୋଗାଇ ଦେବାର ବ୍ୟବସ୍ଥା କରାଯାଇଛି ।

ଚାଷୀ ସରକାରୀ ଧାନ ବିହନ ଉପରେ ନିର୍ଭର କରିଥିବା ବେଳେ ଧାନ ବିହନର କୃତିମ ଅଭାବ ଦେଖା ଦେଇଥିବାରୁ ତୀବ୍ର ଅସନ୍ତୋଷ ପ୍ରକାଶ ପାଇବାରେ ଲାଗିଛି । କୃଷି ବିଭାଗ ପକ୍ଷରୁ ମିଳିଥିବା ତଥ୍ୟ ଅନୁସାରେ ଚଳିତ ଖରିଫରେ କଳାହାଣ୍ଡି ଜିଲ୍ଲାରେ ମୋଟ ୧,୮୫,୫୫୭ ହେକ୍ଟର ଜମିରେ ଧାନ ଚାଷ କରାଯିବାର ଯୋଜନା ହୋଇଛି ।

ସେଥିପାଇଁ ୬୬,୯୪୦ କ୍ୱିଣ୍ଟାଲ ସରକାରୀ ଧାନ ପାଇଁ ଇଣ୍ଡେନ ଦିଆଯାଇଥିବା ବେଳେ ରାଜ୍ୟ ବିହନ ନିଗମ ଦ୍ୱାରା ୪୫,୯୧୮ କ୍ୱିଣ୍ଟାଲ ଧାନ ବିହନ ଯୋଗାଇଦେବାକୁ ଧାର୍ଯ୍ୟ କରିଥିବା ଜଣାପଡିଛି । ତନ୍ମଧ୍ୟରୁ କଳାହାଣ୍ଡି ଜିଲ୍ଲାକୁ ୨୧,୧୨୬ କ୍ୱିଣ୍ଟାଲ ଧାନ ବିହନ ରିହାତି ଦରରେ ଯୋଗାଇ ଦିଆଯାଇଛି ।

ସେହିପରି ରିହାତି ବିହୀନ ଭାବେ କୃଷି ବିଭାଗର ସ୍ୱୀକୃତିପ୍ରାପ୍ତ ବିହନ ଉତ୍ପାଦନକାରୀ ମାନଙ୍କ ଠାରୁ ୧୪,୬୦୦ କ୍ୱିଣ୍ଟାଲ ଏବଂ ବେସରକାରୀ ଧାନ ବିହନ ବିକ୍ରୟକାରୀ ସଂସ୍ଥା ମାନଙ୍କ ଠାରୁ ୫,୫୭୦ କ୍ୱିଣ୍ଟାଲ ଧାନବିହନ ଯୋଗାଇ ଦିଆଯାଇଥିବା ଜଣାପଡିଛି । ଆକଳନ ଅନୁସାରେ ମୋଟ ୬୬,୯୪୦ କ୍ୱିଣ୍ଟାଲ ମଧ୍ୟରୁ ସମୁଦାୟ ୪୧,୨୯୬ କ୍ୱିଣ୍ଟାଲ ଧାନ ବିହନ ଯୋଗାଣ ହୋଇଥିବା ବେଳେ ଆହୁରି ୨୫,୬୪୪ କ୍ୱିଂଟାଲ ଧାନ ବିହନର ଆବଶ୍ୟକତା ରହିଛି ।

ବାସ୍ତବ ପକ୍ଷେ ଚାଷୀମାନଙ୍କ କହିବା ମୁତାବକ ଜିଲ୍ଲାରେ ପ୍ରାୟ ୯୨,୭୫୦ କ୍ୱିଣ୍ଟାଲ ଧାନ ବିହନର ଆବଶ୍ୟକତା ରହିଛି । ଧାନ ବିହନର ଉକ୍ରଟ ଅଭାବ ଯୋଗୁ ଅନ୍ୟାନ୍ୟ ଦିଗରୁ ଚଢା ଦରରେ କ୍ୱିଣ୍ଟାଲ ପିଛା ୩୫୦୦/- ଟଙ୍କାରୁ ଅଧିକ ମୂଲ୍ୟ ଦେଇ କିଣିବାକୁ ଚାଷୀ ବାଧ୍ୟ ହେଉଛି ।

ବହୁ ବିହନ ବିକ୍ରୟକାରୀ ସଂସ୍ଥା ଜିଲ୍ଲାସାରା ଚଢାଦରରେ ଧାନ ବିହନ ବିକ୍ରି କରୁଥିବା ବେଳେ ସେମାନଙ୍କ ଉପରେ କୌଣସି ପ୍ରକାର ଅଙ୍କୁଶ ନାହିଁ । ଫଳତଃ ଅନେକ କ୍ଷେତ୍ରରେ ଚାଷୀ ହିଁ ଶୋଷଣର ଶୀକାର ହେଉଛି ।