ପାଞ୍ଚଜଣ ବରିଷ୍ଠ ଡାକ୍ତରଙ୍କୁ ନିର୍ଦ୍ଦେଶକ ପାହ୍ୟାକୁ ପଦୋନ୍ନତି  ଡାକ୍ତର ବିଜୟ କୁମାର ମହାପାତ୍ର ହେଲେ ସ୍ୱାସ୍ଥ୍ୟ ନିର୍ଦ୍ଦେଶକ  କଳାହାଣ୍ଡି ସିଡିଏମ୍‍ଓ ଡାକ୍ତର ବନଲତା ଦେବୀ ହେଲେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗର ଅତିରିକ୍ତ ସଚିବ  ଗଞ୍ଜାମ ସିଡିଏମ୍‍ଓ ଡାକ୍ତର ବିଜୟ କୁମାର ପାଣିଗ୍ରାହୀଙ୍କୁ ବିଭାଗର ଅତିରିକ୍ତ ସଚିବ ଭାବେ ନିଯୁକ୍ତି  ଡାକ୍ତର ଦୀନବନ୍ଧୁ ପଣ୍ଡା ହେଲେ ରାଉରକେଲା ଆରସିଏଚ୍‍ ନିର୍ଦ୍ଦେଶକ  ଡାକ୍ତର ପ୍ରଦୀପ କୁମାର ମହାପାତ୍ର ହେଲେ ଖାଦ୍ୟ ସୁରକ୍ଷା ନିର୍ଦ୍ଦେଶକ  

ଚିନ୍ତା ବଢ଼ାଉଛି ଚୋରା ମଦ


ଚୋରା ମଦ କାରବାର ଏବେ ସରକାରଙ୍କ ଚିନ୍ତା ବଢ଼ାଇବାରେ ଲାଗିଛି । ଏଭଳି ବେଆଇନ କାରବାର ରୋକିବାକୁ ବ୍ୟାପକ ପଦକ୍ଷେପ ନିଆଯାଉଥିବା ବେଳେ ଗତ ୭ ମାସ ମଧ୍ୟରେ ଚୋରାମଦ କାରବାର କରି ରାଜ୍ୟରେ ୧୧ ହଜାରରୁ ଅଧିକ ଲୋକ ବନ୍ଧା ହେଲେଣି ।

ମିଳିଥିବା ସୂଚନାନୁଯାୟୀ ଚଳିତବର୍ଷ ଏପ୍ରିଲରୁ ଅକ୍ଟୋବର ମାସ ମଧ୍ୟରେ ଚୋରାମଦ କାରବାର କରୁଥିବା ୧୧,୭୪୬ ଜଣଙ୍କୁ ପୋଲିସ ଗିରଫ କରିଛି । ଏମାନଙ୍କ ମଧ୍ୟରୁ ସୁନ୍ଦରଗଡ଼ ଜିଲ୍ଲାର ସର୍ବାଧିକ ୧୨୯୧ ଜଣ ଥିବା ବେଳେ ମୟୂରଭଞ୍ଜ ଜିଲ୍ଲାର ୧୦୫୩ ଜଣ ଅଛନ୍ତି । ସେହିଭଳି ସମ୍ବଲପୁରରେ ୬୩୭, ବାଲେଶ୍ୱରରେ ୬୦୫, ଖୋର୍ଦ୍ଧାରେ ୫୬୨, ଅନୁଗୁଳରେ ୫୩୩, କେନ୍ଦୁଝରରେ ୫୦୭, କୋରାପୁଟରେ ୪୬୮ ଓ ବଲାଙ୍ଗୀରରେ ୪୪୫ ଜଣ ଗିରଫ ହୋଇଛନ୍ତି । ତେବେ ସବୁଠାରୁ କମ୍‍ ୧୫୫ ଜଣ ଗିରଫ ହୋଇଛନ୍ତି କେନ୍ଦ୍ରାପଡ଼ା ଜିଲ୍ଲାରେ ।

ଏହି ସମୟ ମଧ୍ୟରେ ପୋଲିସ ୧,୭୦,୬୧୧ ଲିଟର ଚୋରା ମଦ ଜବତ କରିଛି । ଏଥିମଧ୍ୟରୁ ବାଲେଶ୍ୱର ଜିଲ୍ଲାରୁ ସର୍ବାଧିକ ୨୮,୫୮୭ ଲିଟର ମଦ ଜବତ ହୋଇଥିବା ବେଳେ ସୁନ୍ଦରଗଡ଼ରେ ୨୭,୫୮୦ ଓ ମୟୂରଭଞ୍ଜରେ ୧୩,୪୫୬ ଲିଟର ଚୋରାମଦ ଜବତ ହୋଇଛି । ତେବେ କନ୍ଧମାଳ, ନବରଙ୍ଗପୁର, ଗଞ୍ଜାମ, କେନ୍ଦ୍ରାପଡ଼ା ଓ ଜଗତସିଂହପୁର ଜିଲ୍ଲାରେ ଚୋରାମଦ ଧରାପଡ଼ିନଥିବା ଦର୍ଶାଯାଇଛି ।

ଏହି ଚୋରାମଦ ମଧ୍ୟରେ ଭାରତ ତିଆରି ବିଦେଶୀ ମଦ ସଂଖ୍ୟା ୪୮୦୫ ଲିଟର ହୋଇଥିବା ବେଳେ ୬୨୬୨ଟି ବିୟର ବୋତଲ ବି ଜବତ ହୋଇଛି । ସେହିଭଳି ପୋଲିସ ୧୫୭୫ ଲିଟର ତାଡ଼ି, ୭୪୪ ଲିଟର ସ୍ପିରିଟ୍‍ ଓ ୭୨୭ କିଲୋ ଭାଙ୍ଗ ଜବତ କରିଥିବା କୁହାଯାଇଛି ।

ତେବେ ଚୋରାମଦ କାରବାର ଲାଗି ପ୍ରତ୍ୟେକ ଜିଲ୍ଲାରେ ପୋଲିସ, ଅବକାରୀ, ଜଙ୍ଗଲ ଓ ରାଜସ୍ୱ ଅଧିକାରୀଙ୍କୁ ନେଇ ଗଠନ କରାଯାଇଥିବା ଟିମ୍‍ ଜୋରଦାର୍‍ ଚଢ଼ାଉ କରିବା ସହିତ ମୋକଦ୍ଦମା ରୁଜୁ କରୁଛି । କଟକ, ବ୍ରହ୍ମପୁର ଓ ସମ୍ବଲପୁରରେ ରାଜ୍ୟସ୍ତରୀୟ ଅବକାରୀ ଗୁଇନ୍ଦା ସଂସ୍ଥା ଚୋରା ମଦ କାରବାର ଉପରେ ତୀକ୍ଷ୍‍ଣ ନଜର ରଖିଛି । ରାଜ୍ୟ ବାହାରୁ ଯେଭଳି ନକଲି ମଦ ଓଡ଼ିଶାକୁ ନ ଆସିବ ସେଥିଲାଗି ସୀମାନ୍ତ ତନଖି ଫାଟକଗୁଡ଼ିକରେ ନିୟମିତ ଭାବେ ଅବକାରୀ ଯାଞ୍ଚ ହେଉଛି । ଏତେସବୁ ସତ୍ତେ୍ୱ କିନ୍ତୁ ଚୋରା ମଦ ବେପାରୀମାନେ ଯେଉଁ ହାରରେ ରାଜ୍ୟରେ ଗିରଫ ହେଉଛନ୍ତି ତାହା ଉଭୟ ସରକାର ଓ ସାଧାରଣ ଲୋକଙ୍କ ଚିନ୍ତା ବଢ଼ାଇବାରେ ଲାଗିଛି ।  



ସମ୍ପାଦକ: ବ୍ରଜ କିଶୋର ମିଶ୍ର

©Tathya Media Pvt. Ltd. 2020