ପାଞ୍ଚଜଣ ବରିଷ୍ଠ ଡାକ୍ତରଙ୍କୁ ନିର୍ଦ୍ଦେଶକ ପାହ୍ୟାକୁ ପଦୋନ୍ନତି  ଡାକ୍ତର ବିଜୟ କୁମାର ମହାପାତ୍ର ହେଲେ ସ୍ୱାସ୍ଥ୍ୟ ନିର୍ଦ୍ଦେଶକ  କଳାହାଣ୍ଡି ସିଡିଏମ୍‍ଓ ଡାକ୍ତର ବନଲତା ଦେବୀ ହେଲେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗର ଅତିରିକ୍ତ ସଚିବ  ଗଞ୍ଜାମ ସିଡିଏମ୍‍ଓ ଡାକ୍ତର ବିଜୟ କୁମାର ପାଣିଗ୍ରାହୀଙ୍କୁ ବିଭାଗର ଅତିରିକ୍ତ ସଚିବ ଭାବେ ନିଯୁକ୍ତି  ଡାକ୍ତର ଦୀନବନ୍ଧୁ ପଣ୍ଡା ହେଲେ ରାଉରକେଲା ଆରସିଏଚ୍‍ ନିର୍ଦ୍ଦେଶକ  ଡାକ୍ତର ପ୍ରଦୀପ କୁମାର ମହାପାତ୍ର ହେଲେ ଖାଦ୍ୟ ସୁରକ୍ଷା ନିର୍ଦ୍ଦେଶକ  

ପ୍ରଫେସର ଓ କର୍ମଚାରୀ ମରୁଡ଼ି


ଉତ୍‍କଳ ବିଶ୍ୱବିଦ୍ୟାଳୟରେ ଶତାଧିକ ଶିକ୍ଷକ ପଦବୀ ଖାଲି ପଡ଼ିଥିବା ବେଳେ ୬୦୦ରୁ ଅଧିକ ଅଣଶିକ୍ଷକ ପଦବୀ ମଧ୍ୟ ପୂରଣ ହୋଇପାରୁନାହିଁ । ଅନ୍ୟପଟେ ଅର୍ଥାଭାବ କାରଣ ଦର୍ଶାଇ ଶିକ୍ଷକ ଓ ଅଣଶିକ୍ଷକମାନଙ୍କ କ୍ୱାର୍ଟର୍ସ ଏବଂ ଛାତ୍ରାବାସ ଓ ଛାତ୍ରୀ ନିବାସଗୁଡ଼ିକର ମରାମତି ହୋଇପାରୁନଥିବା ବେଳେ ସେଥିରୁ କେତେକ ଭୁଶୁଡ଼ିବା ଅବସ୍ଥାକୁ ଆସିଲାଣି । ଅଥଚ ବିଶ୍ୱବିଦ୍ୟାଳୟର ଏହି ମୌଳିକ ସମସ୍ୟା ସମାଧାନକୁ ଗୌଣ କରାଯାଇ ୭୫ ବର୍ଷ ପୂର୍ତ୍ତି କାର୍ଯ୍ୟକ୍ରମରେ କୋଟିଏ ଟଙ୍କା ଖର୍ଚ୍ଚ ହେବ ବୋଲି ଗଣମାଧ୍ୟମରେ ପ୍ରକାଶ ପାଇଛି । ଏଥିଘେନି ଛାତ୍ରଛାତ୍ରୀ ତଥା କର୍ମଚାରୀ ମହଲରେ ମିଶ୍ର ପ୍ରତିକ୍ରିୟା ସୃଷ୍ଟି ହୋଇଛି ।

ସରକାରୀ ହିସାବ ମୁତାବକ ଉତ୍‍କଳ ବିଶ୍ୱବିଦ୍ୟାଳୟ ଲାଗି ୪୭ଟି ମଞ୍ଜୁରୀପ୍ରାପ୍ତ ପ୍ରଫେସର ପଦବୀ ଥିବା ବେଳେ ସେଥିରୁ ୩୧ଟି ଖାଲି । ସେହିପରି ଏହି ବିଶ୍ୱବିଦ୍ୟାଳୟ ଲାଗି ୭୬ଟି ସହଯୋଗୀ ପ୍ରଫେସର ପଦବୀ ଥିବା ବେଳେ ସେଥିରୁ ବି ୪୨ଟି ଖାଲିପଡ଼ିଛି । ବିଶ୍ୱବିଦ୍ୟାଳୟର ୧୩୪ଟି ମଞ୍ଜୁରୀପ୍ରାପ୍ତ ସହଯୋଗୀ ପ୍ରଫେସର ପଦବୀ ମଧ୍ୟରୁ ତେବେ ୪୭ଟି ଖାଲି ଅଛି ।

ଏଠାରେ ଉଲ୍ଲେଖନୀୟ ଯେ ଗତବର୍ଷ ସେପ୍ଟେମ୍ବର ମାସରେ ରାଜ୍ୟ ସରକାର ଦେଇଥିବା ତଥ୍ୟ ଅନୁଯାୟୀ ଉତ୍‍କଳ ବିଶ୍ୱବିଦ୍ୟାଳୟରେ ୨୮ଟି ପ୍ରଫେସର, ୩୮ଟି ସହଯୋଗୀ ପ୍ରଫେସର ଓ ୪୨ଟି ସହକାରୀ ପ୍ରଫେସର ପଦବୀ ଖାଲିଥିଲା । ବର୍ଷକ ମଧ୍ୟରେ ଖାଲି ପଦବୀ ସଂଖ୍ୟା କମିବା ପରିବର୍ତ୍ତେ ବଢ଼ି ଚାଲିଛି । ଏଥିଯୋଗୁ ରାଜ୍ୟର ଏହି ସର୍ବପୁରାତନ ବିଶ୍ୱବିଦ୍ୟାଳୟରେ ଶିକ୍ଷାଦାନ ଓ ଗବେଷଣା କାର୍ଯ୍ୟ ଗୁରୁତର ଭାବେ ବ୍ୟାହାତ ହେଉଛି ।

ସେହିପରି ଉତ୍‍କଳ ବିଶ୍ୱବିଦ୍ୟାଳୟ ଲାଗି ହଜାରେଟି ମଞ୍ଜୁରପ୍ରାପ୍ତ ଅଣଶିକ୍ଷକ ପଦବୀ ଥିବା ବେଳେ ଏଥିରୁ ଗତବର୍ଷ ସେପ୍ଟେମ୍ବର ସୁଦ୍ଧା ୫୫୭ଟି ଖାଲି ପଡ଼ିଥିଲା । ଏବେ ଖାଲି ପଦବୀ ସଂଖ୍ୟା କମିବା ପରିବର୍ତ୍ତେ ବଢ଼ି ବଢ଼ି ୬୧୩ଟିରେ ପହଞ୍ଚିଛି । ଗୋଟିଏ ପଟେ ସରକାର ଓ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଗୁଣାତ୍ମକ ତଥା ବିଶ୍ୱସ୍ତରୀୟ ଶିକ୍ଷା ଓ ଗବେଷଣା କଥା କହୁଛନ୍ତି । ଅନ୍ୟପକ୍ଷରେ ରାଜ୍ୟର ଏକମାତ୍ର ଏ ପ୍ଲସ୍‍ ନ୍ୟାକ୍‍ ମାନ୍ୟତାପ୍ରାପ୍ତ ବିଶ୍ୱବିଦ୍ୟାଳୟରେ ଶିକ୍ଷକ ଓ ଅଣଶିକ୍ଷକ ମରୁଡ଼ି ଉତ୍‍କଟ ସ୍ଥିତିରେ ପହଞ୍ଚିଥିବା ବେଳେ ମୂଳ ସମସ୍ୟାର ସମାଧାନ ହୋଇପାରୁନାହିଁ ।

ବିଶ୍ୱବିଦ୍ୟାଳୟ ପରିସରରେ ଥିବା କ୍ୱାର୍ଟର୍ସଗୁଡ଼ିକ ମଧ୍ୟରୁ ଅଧିକାଂଶ ମରାମତି ଅଭାବରୁ ଜରାଜୀର୍ଣ୍ଣ ଅବସ୍ଥାରେ ପଡ଼ିଛନ୍ତି । କେତେବେଳେ କେଉଁ କ୍ୱାର୍ଟର୍ର୍ସ ଭୁଶୁଡ଼ି କାହାର ଜୀବନ ଯିବ କହି ହେଉନାହିଁ । ଅଳ୍ପ କେତୋଟି ମୁଖ୍ୟ ରାସ୍ତାକୁ ଛାଡ଼ିଦେଲେ ପରିସରର ଅଧିକାଂଶ ରାସ୍ତା ଖାଲଖମାରେ ଭର୍ତ୍ତି । ଅନେକ ସ୍ଥାନରେ ଷ୍ଟ୍ରିଟ୍‍ ଲାଇଟ୍‍ ନାହିଁ । ଏମିତିକି ଛାତ୍ରାବାସ ଓ ଛାତ୍ରୀ ନିବାସଗୁଡ଼ିକର ଅବସ୍ଥା ବେଶ୍‍ ସାଙ୍ଘାତିକ । ଟୋପାଏ ଶୁଦ୍ଧ ପାନୀୟ ଜଳ ପାଇଁ ଏଠାରେ ଛାତ୍ରୀମାନଙ୍କୁ କୁଳପତିଙ୍କ ଦପ୍ତର ଘେରାଉ କରିବାକୁ ପଡ଼ୁଛି । ଛାତ୍ରାବାସରେ ଏବେ ବି ଅନେକ ଅଣଛାତ୍ର ଆଡ୍ଡା ଜମାଇ ରହୁଛନ୍ତି । ବିଶ୍ୱବିଦ୍ୟାଳୟ ପରିସରରେ ଏମାନଙ୍କ ଦୌରାତ୍ମ୍ୟ ଯୋଗୁ ନାହିଁ ନ ଥିବା ସମସ୍ୟା ସୃଷ୍ଟି ହେଉଛି ।

ବିଶ୍ୱବିଦ୍ୟାଳୟର ସ୍ଥିତି ଏଭଳି ଥିବା ବେଳେ ନିକଟରେ ଗାନ୍ଧୀ ଜୟନ୍ତୀ ଅବସରରେ ପ୍ରାୟ ୭୫ ଲକ୍ଷ ଟଙ୍କା ଖର୍ଚ୍ଚରେ ବାପୁଙ୍କ ମୂର୍ତ୍ତି ସହିତ ଅହିଂସା ସ୍ଥଳ ନାମରେ ପିଣ୍ଡି ନିର୍ମାଣ କରାଯାଇଛି । କିନ୍ତୁ ଅସମ୍ପୂର୍ଣ୍ଣ କାମ ଓ ରକ୍ଷଣାବେକ୍ଷଣ ଅଭାବରୁ ଏହାର ସ୍ଥିତି ବି ସେତେ ଭଲ ନୁହେଁ । ଏଣେ ବିଶ୍ୱବିଦ୍ୟାଳୟର ୭୫ତମ ପ୍ରତିଷ୍ଠା ଉତ୍ସବ ଧୁମ୍‍ଧାମ୍‍ରେ ପାଳନ କରିବା ପାଇଁ କୋଟିଏ ଟଙ୍କା ଖର୍ଚ୍ଚ ହେବ ବୋଲି ଗଣମାଧ୍ୟମରେ ପ୍ରଚାର କରାଯାଉଛି । ଶିକ୍ଷକ ଓ କର୍ମଚାରୀ ନିଯୁକ୍ତି ସହ ବିଶ୍ୱବିଦ୍ୟାଳୟର କୋଠାବାଡ଼ି ଓ ରାସ୍ତାଘାଟର ସଂରକ୍ଷଣ, ବିଶ୍ୱବିଦ୍ୟାଳୟ ଭିତରୁ ଜବରଦଖଲ ଓ ବସ୍ତି ଉଚ୍ଛଦ, ଛାତ୍ରାବାସଗୁଡ଼ିକୁ ଅଣଛାତ୍ରଙ୍କ କବଳରୁ ମୁକ୍ତ କରିବା ଆଦି ସମସ୍ୟାକୁ ପ୍ରାଥମିକତା ଦେବା ପାଇଁ ଉଭୟ ଛାତ୍ରଛାତ୍ରୀ ଓ କର୍ମଚାରୀ ମହଲରୁ ଦାବି ହେଉଛି ।  



ସମ୍ପାଦକ: ବ୍ରଜ କିଶୋର ମିଶ୍ର

©Tathya Media Pvt. Ltd. 2020