ଓଡ଼ିଶାକୁ ଫନି ସହାୟତା ଦେଲେ କେନ୍ଦ୍ର ସରକାର  ଓଡ଼ିଶାକୁ ମିଳିଲା ୩୩୩୮.୨୨ କୋଟିର ସହାୟତା ରାଶି  ଫନି ପରବର୍ତ୍ତୀ ଥଇଥାନ ପାଇଁ ସହାୟତା ରାଶି ଘୋଷଣା  

କମ୍ପ୍ୟୁଟର ପାଠପଢା ବନ୍ଦ


ରାଜ୍ୟରେ ୪ ହଜାର ବିଦ୍ୟାଳୟରେ ଏବେ କମ୍ପ୍ୟୁଟର ପାଠପଢ଼ା ବନ୍ଦ । ଚାକିରି ବଞ୍ଚାଇବା ପାଇଁ କମ୍ପ୍ୟୁଟର ଶିକ୍ଷକମାନେ ରାଜରାସ୍ତାରେ ଆନ୍ଦୋଳନ କରୁଥିବା ବେଳେ ବିଦ୍ୟାଳୟରେ ଥିବା କମ୍ପ୍ୟୁଟର ଓ ଅନ୍ୟାନ୍ୟ ସାଜ ସରଞ୍ଜାମ ଖତ ହେବାରେ ଲାଗିଲାଣି । କମ୍ପ୍ୟୁଟର ପାଠପଢ଼ା ପାଇଁ ଧାର୍ଯ୍ୟ ହୋଇଥିବା ସମୟରେ ହାଇସ୍କୁଲ ପିଲା ଏବେ ପଡ଼ିଆରେ ଦୌଡ଼ୁଛନ୍ତି ।

ରାଜ୍ୟର ହାଇସ୍କୁଲଗୁଡ଼ିକରେ ଛାତ୍ରଛାତ୍ରୀଙ୍କୁ କମ୍ପ୍ୟୁଟର ଶିକ୍ଷା ପ୍ରଦାନ ଲାଗି ୨୦୧୪ ମସିହାରେ ୪ହଜାର ବିଦ୍ୟାଳୟରେ ଇନ୍‍ଫର୍ମେସନ୍‍ ଆଣ୍ଡ କମ୍ୟୁନିକେସନ୍‍ ଟେକ୍ନୋଲୋଜୀ(ଆଇସିଟି) ପାଠ୍ୟକ୍ରମ ଆରମ୍ଭ ହୋଇଥିଲା । ଏହି ଯୋଜନାରେ ପ୍ରତ୍ୟେକ ବିଦ୍ୟାଳୟରେ କମ୍ପ୍ୟୁଟର ଶିକ୍ଷକ ନିଯୁକ୍ତ ହୋଇଥିଲେ । ତେବେ ରାଜ୍ୟ ସରକାର ସିଧାସଳଖ କମ୍ପ୍ୟୁଟର ପାଠପଢ଼ା ଦାୟିତ୍ୱ ନ ନେଇ ଆଇଏଲ୍‍ ଆଣ୍ଡ ଏଫ୍‍ଏସ୍‍ ସଂସ୍ଥା ଦ୍ୱାରା ଏହା କରିଥିଲେ । ଏଥିପାଇଁ ଉକ୍ତ ସଂସ୍ଥା ସହିତ ୫ ବର୍ଷିୟା ରାଜିନାମା ହୋଇଥିଲା ।

ଚଳିତ ବର୍ଷ ରାଜ୍ୟ ସରକାରଙ୍କ ସହିତ ହୋଇଥିବା ଚୁକ୍ତିର ଅବଧି ସରିଯିବା ପରେ ନିଯୁକ୍ତ ହୋଇଥିବା କମ୍ପ୍ୟୁଟର ଶିକ୍ଷକମାନଙ୍କର ଚାକିରିରେ ବି ପୂର୍ଣ୍ଣଛେଦ ପଡ଼ିଥିଲା । ରାଜ୍ୟ ସରକାର ଚୁକ୍ତିମିଆଦି ନ ବଢ଼ାଇବା ଯୋଗୁ ଏହି କମ୍ପ୍ୟୁଟର ଶିକ୍ଷକମାନେ ଜୀବନ ଜୀବିକା ପାଇଁ ଆନ୍ଦୋଳନ କରୁଛନ୍ତି । ଏଣେ ଏହି ଯୋଜନାରେ ବିଦ୍ୟାଳୟଗୁଡ଼ିକୁ ଯୋଗାଇ ଦିଆଯାଇଥିବା କମ୍ପ୍ୟୁଟର, ପ୍ରିଣ୍ଟର, ପ୍ରୋଜେକ୍ଟର ଓ ଜେନେରେଟର ଆଦି ଉପରେ ଧୂଳି ଜମିଲାଣି ।

ଆଇସିଟି ସ୍କୁଲ ସ୍କିମ୍‍ ପଲିସି ଅନୁଯାୟୀ ୫ ବର୍ଷିୟା ଚୁକ୍ତି ମଧ୍ୟରେ ବିଦ୍ୟାଳୟର ଶିକ୍ଷକମାନେ କମ୍ପ୍ୟୁଟର ତାଲିମ ନେବେ ଓ ପରବର୍ତ୍ତୀ ସମୟରେ ପିଲାମାନଙ୍କୁ କମ୍ପ୍ୟୁଟର ପାଠ ପଢ଼ାଇବେ । ହେଲେ ଅଧିକାଂଶ ହାଇସ୍କୁଲରେ ଘରୋଇ ସଂସ୍ଥା ଦ୍ୱାରା ନିଯୁକ୍ତ କମ୍ପ୍ୟୁଟର ଶିକ୍ଷକମାନେ ପିଲାଙ୍କୁ ପାଠ ପଢ଼ାଇବା ଅପେକ୍ଷା ବହୁ ସମୟରେ ବିଦ୍ୟାଳୟର କାଗଜପତ୍ର କାମରେ ବ୍ୟସ୍ତ ରହିଲେ । ଶିକ୍ଷକ ତ ଦୂରର କଥା ବିଦ୍ୟାଳୟରେ ଥିବା କିରାଣିମାନେ ବି ଏଥିଯୋଗୁ କମ୍ପ୍ୟୁଟର ଶିଖିବା ପାଇଁ ଆଗ୍ରହୀ ହେଲେ ନାହିଁ । ଫଳରେ ଏବେ ହାଇସ୍କୁଲଗୁଡ଼ିକରେ ସବୁ ସାଜ ସରଞ୍ଜାମ ଥାଇ କମ୍ପ୍ୟୁଟର ପାଠପଢ଼ା ହୋଇପାରୁନାହିଁ ।

ପ୍ରତି ସପ୍ତାହରେ କମ୍ପ୍ୟୁଟର ପାଠ ପାଇଁ ବିଦ୍ୟାଳୟରେ ୨ଟି ପିରିଅଡ୍‍ ରହିଥିବା ବେଳେ ଏବେ ସେହି ସମୟରେ ପିଲାମାନେ ଖେଳକୁଦରେ ମାତିଛନ୍ତି । ହାଇସ୍କୁଲ ପକ୍ଷରୁ ଏ ନେଇ ଶିକ୍ଷକ ନ ଥିବା ଦର୍ଶାଯାଉଥିବା ବେଳେ ସରକାର ବି ନିରବତା ଅବଲମ୍ବନ କରୁଛନ୍ତି । ତେଣୁ ବିଦ୍ୟାଳୟ ସ୍ତରରେ ପିଲାଙ୍କୁ କମ୍ପ୍ୟୁଟର ଶିକ୍ଷାଦାନ ପାଇଁ ଯେଉଁ ଯୋଜନା ହୋଇଥିଲା ତାହା ଏବେ ଏକପ୍ରକାର ବାଟବଣା ହୋଇଯାଇଛି । ଯଦି ସରକାର ଖୁବ୍‍ଶୀଘ୍ର ଏ ଦିଗରେ ପଦକ୍ଷେପ ଗ୍ରହଣ ନ କରନ୍ତି ତେବେ ବିଦ୍ୟାଳୟଗୁଡ଼ିକରେ ଥିବା କୋଟି କୋଟି ଟଙ୍କାର କମ୍ପ୍ୟୁଟର ଓ ଆନୁଷଙ୍ଗିକ ଯନ୍ତ୍ରପାତି ଖତ ହେବା ନିଶ୍ଚିତ ବୋଲି କୁହାଯାଉଛି । 



ସମ୍ପାଦକ: ବ୍ରଜ କିଶୋର ମିଶ୍ର

©Tathya Media Pvt. Ltd. 2019