ପାଞ୍ଚଜଣ ବରିଷ୍ଠ ଡାକ୍ତରଙ୍କୁ ନିର୍ଦ୍ଦେଶକ ପାହ୍ୟାକୁ ପଦୋନ୍ନତି  ଡାକ୍ତର ବିଜୟ କୁମାର ମହାପାତ୍ର ହେଲେ ସ୍ୱାସ୍ଥ୍ୟ ନିର୍ଦ୍ଦେଶକ  କଳାହାଣ୍ଡି ସିଡିଏମ୍‍ଓ ଡାକ୍ତର ବନଲତା ଦେବୀ ହେଲେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗର ଅତିରିକ୍ତ ସଚିବ  ଗଞ୍ଜାମ ସିଡିଏମ୍‍ଓ ଡାକ୍ତର ବିଜୟ କୁମାର ପାଣିଗ୍ରାହୀଙ୍କୁ ବିଭାଗର ଅତିରିକ୍ତ ସଚିବ ଭାବେ ନିଯୁକ୍ତି  ଡାକ୍ତର ଦୀନବନ୍ଧୁ ପଣ୍ଡା ହେଲେ ରାଉରକେଲା ଆରସିଏଚ୍‍ ନିର୍ଦ୍ଦେଶକ  ଡାକ୍ତର ପ୍ରଦୀପ କୁମାର ମହାପାତ୍ର ହେଲେ ଖାଦ୍ୟ ସୁରକ୍ଷା ନିର୍ଦ୍ଦେଶକ  

ହାଇକୋର୍ଟରେ ଦେଢ ଲକ୍ଷ ମାମଲା


ଓଡିଶା ହାଇକୋର୍ଟରେ ଏବେ ପ୍ରାୟ ଦେଢ ଲକ୍ଷ ମୋକଦ୍ଦମା ବିଚାର ପ୍ରତୀକ୍ଷାରେ ରହିଛି । ହାଇକୋର୍ଟରେ ପାଖାପାଖି ଅଧା ବିଚାରପତି ପଦବୀ ଖାଲିପଡିଥିବାରୁ ମାମଲା ଗୁଡିକର ତ୍ୱରିତ ଫଏସଲା ହେବା କ୍ଷେତ୍ରରେ ସମସ୍ୟା ଉପୁଜୁଛି । ଓଡିଶା ହାଇକୋର୍ଟ ପାଇଁ ୨୭ଟି ମଞ୍ଜୁରୀପ୍ରାପ୍ତ ବିଚାରପତି ପଦବୀ ଥିବାବେଳେ ଏଥିରୁ ଏବେ ୧୩ଟି ଖାଲିପଡିଛି ।

ସର୍ବଶେଷ ହିସାବ ଅନୁଯାୟୀ ହାଇକୋର୍ଟରେ ଆଜି ସୁଦ୍ଧା ୧,୪୯,୦୩୪ଟି ମାମଲା ବିଚାର ପ୍ରତୀକ୍ଷାରେ ରହିଛି । ସେଥିରୁ ୫୬୪ଟି ମାମଲା ୩୦ବର୍ଷରୁ ଅଧିକ ପୁରୁଣା ଥିବାବେଳେ ୩୩୬୧ଟି ହେଉଛି ୨୦ରୁ ୩୦ବର୍ଷର ପୁରୁଣା । ଓଡିଶା ହାଇକୋର୍ଟରେ ୧୦ରୁ ୨୦ବର୍ଷ ଧରି ଗଡୁଥିବା ୨୨,୬୬୭ଟି ମାମଲା ବିଚାର ପ୍ରତୀକ୍ଷାରେ ଥିବାବେଳେ ୫ରୁ ୧୦ବର୍ଷର ପୁରୁଣା ମାମଲା ସଂଖ୍ୟା ହେଉଛି ୩୬,୩୭୦ । ଏହାଛଡା ୩ରୁ ୫ବର୍ଷର ୨୨,୪୮୩ଟି ପୁରୁଣା ମାମଲା ଥିବାବେଳେ ବର୍ଷେରୁ ୩ବର୍ଷର ପୁରୁଣା ମାମଲା ସଂଖ୍ୟା ହେଉଛି ୨୯,୮୪୮ । ତେବେ ଆମ ହାଇକୋର୍ଟରେ ବର୍ଷେକରୁ କମ୍‍ ଅବଧିର ୩୩,୭୪୧ଟି ମାମଲା ଥିବା ନେସ୍‍ନାଲ ଜୁଡିସିଆଲ ଡାଟା ଗ୍ରିଡ୍‍ ୱେବସାଇଟ୍‍ର ପ୍ରଦତ୍ତ ତଥ୍ୟରୁ ଜଣାପଡିଛି ।

ରାଜ୍ୟ ହାଇକୋର୍ଟରେ ଯେତେ ମାମଲା ବିଚାର ପ୍ରତୀକ୍ଷାରେ ରହିଛି ସେଥିରୁ ୪୦,୬୩୫ଟି ଅପରାଧିକ ମାମଲା ଥିବାବେଳେ ୩୯,୮୯୫ଟି ହେଉଛି ସିଭିଲ ମାମଲା । ଏହାଛଡା ଆଉ ୬୮,୫୦୪ଟି ରିଟ୍‍ ପିଟିସନ ମଧ୍ୟ ଓଡିଶା ହାଇକୋର୍ଟରେ ବିଚାର ପାଇଁ ଅଛି । ହାଇକୋର୍ଟରେ ଥିବା ଅପରାଧିକ ମାମଲା ଗୁଡିକ ମଧ୍ୟରୁ ୭ଟି ୩୦ବର୍ଷରୁ ଅଧିକ ସମୟ ଧରି ପଡିଥିବାବେଳେ ୬୫୪ଟି ୨୦ରୁ ୩୦ବର୍ଷ, ୭୭୩୯ଟି ୧୦ରୁ ୨୦ବର୍ଷ, ୮୫୪୭ଟି ୫ରୁ ୧୦ବର୍ଷ ଓ ୪୬୫୪ଟି ୩ରୁ ୫ବର୍ଷର ପୁରୁଣା ।

ସେହିପରି ସିଭିଲ ମାମଲା ଗୁଡିକ ମଧ୍ୟରୁ ୫୪୮ଟି ୩୦ବର୍ଷରୁ ଅଧିକ ପୁରୁଣା ଥିବାବେଳେ ୨୦୧୦ଟି ୨୦ରୁ ୩୦ବର୍ଷ, ୮୩୮୯ଟି ୧୦ରୁ ୨୦ବର୍ଷ, ୮୧୪୮ଟି ୫ରୁ ୧୦ବର୍ଷ, ୫୩୪୭ଟି ୩ରୁ ୫ବର୍ଷ ଓ ୭୩୧୬ଟି ବର୍ଷେରୁ ୩ବର୍ଷ ପର୍ଯ୍ୟନ୍ତ ପୁରୁଣା । ଓଡିଶା ହାଇକୋର୍ଟରେ ବିଚାର ପ୍ରତୀକ୍ଷାରେ ଥିବା ୬୮,୫୦୪ଟି ରିଟ୍‍ ଆବେଦନ ମଧ୍ୟରୁ ୯ଟି ୩୦ବର୍ଷରୁ ଅଧିକ ପୁରୁଣା ଥିବାବେଳେ ୬୯୭ଟି ୨୦ରୁ ୩୦ବର୍ଷ, ୬୫୩୯ଟି ୧୦ରୁ ୨୦ବର୍ଷ, ୧୯,୬୭୫ଟି ୫ରୁ ୧୦ବର୍ଷ, ୧୨,୪୮୨ଟି ୩ରୁ ୫ବର୍ଷ ଓ ୧୬,୨୬୩ଟି ବର୍ଷେରୁ ୩ବର୍ଷ ପର୍ଯ୍ୟନ୍ତ ପୁରୁଣା ମାମଲା ବୋଲି ଏହି ତଥ୍ୟ କହୁଛି । ଗତମାସରେ ହାଇକୋର୍ଟରେ ୯୯୪୬ଟି ମାମଲାର ଫଏସଲା ହୋଇଛି ।

ହାଇକୋର୍ଟର ବରିଷ୍ଠ ଆଇନ୍‍ଜୀବୀମାନେ କହୁଛନ୍ତି ଯେ ଏଠାରେ ବିଚାରପତିମାନେ ମାମଲା ଫଏସଲା ପାଇଁ ଅକ୍ଲାନ୍ତ ପରିଶ୍ରମ କରୁଛନ୍ତି ଏବଂ ଲୋକ ଅଦାଲତ ମାଧ୍ୟମରେ ବି ଅନେକ ମାମଲା ଫଏସଲା ହେଉଛି । ତେବେ ହାଇକୋର୍ଟରେ ଯେତିକି ମାମଲା ବିଚାର ପ୍ରତୀକ୍ଷାରେ ରହିଛି ଓ ଯେତେ ନୂଆ ମାମଲା ରୁଜୁ ହେଉଛି ତାହାର ଫଏସଲା ଲାଗି ମଞ୍ଜୁରୀପ୍ରାପ୍ତ ବିଚାରପତି ସଂଖ୍ୟା ୪୨କୁ ବଢାଇବା ସଂଗେ ସଂଗେ ଖାଲିଥିବା ସମସ୍ତ ବିଚାରପତି ପଦବୀ ତୁରନ୍ତ ପୂରଣ କରାଯିବା ଦରକାର ।

ଏହା ନକରି ସରକାର ସ୍ୟାଟ୍‍ରେ ବିଚାର ପ୍ରତୀକ୍ଷାରେ ଥିବା ପ୍ରାୟ ୭୨ହଜାର ମାମଲାର ବୋଝ ହାଇକୋର୍ଟ ଉପରେ ଲଦୁଛନ୍ତି । ଫଳରେ ହାଇକୋର୍ଟରେ ମାମଲା ସଂଖ୍ୟା ୨ଲକ୍ଷ ୨୦ହଜାରକୁ ଟପିଯିବ । କେବଳ ସ୍ୟାଟ୍‍ର ପୁରୁଣା ମାମଲା ଓ ଚାକିରି ତଥା ପେନ୍‍ସନ ସଂକ୍ରାନ୍ତୀୟ ନୂଆ ମାମଲାର ବିଚାରପାଇଁ ହାଇକୋର୍ଟରେ ଅନ୍ୟୁନ ଆଉ ୮ଜଣ ନୂଆ ବିଚାରପତିଙ୍କ ଆବଶ୍ୟକତା ରହିଛି । ଏହା କରାନଗଲେ ଚାକିରି ତଥା ପେନ୍‍ସନ ସଂକ୍ରାନ୍ତୀୟ ପୁରୁଣା ଓ ନୂଆ ମାମଲା ଗୁଡିକ ବହୁବର୍ଷ ଧରି ଗଡିବାର ଆଶଙ୍କା ଅଛି । ଏ ପରିପ୍ରେକ୍ଷୀରେ ଉଭୟ କେନ୍ଦ୍ର ଓ ରାଜ୍ୟ ସରକାର ସ୍ୟାଟ୍‍ ଉଚ୍ଛେଦ ନିଷ୍ପତ୍ତି ପ୍ରତ୍ୟାହାର କରି ଏଠାରେ ବି ଅଧିକ ସଂଖ୍ୟକ ଦକ୍ଷ ବିଚାରପତି ନିଯୁକ୍ତି ଦେବାକୁ ମତପ୍ରକାଶ ପାଉଛି ।  



ସମ୍ପାଦକ: ବ୍ରଜ କିଶୋର ମିଶ୍ର

©Tathya Media Pvt. Ltd. 2020