ସବୁଜ ବିପ୍ଳବ ଫଳପ୍ରଦ

ପୂର୍ବ ଭାରତରେ ସବୁଜ ବିପ୍ଳବ କାର୍ଯ୍ୟକ୍ରମକୁ ଆଗେଇ ନେବାପାଇଁ କେନ୍ଦ୍ର ସରକାର ଯେଉଁ ଜାତୀୟ ଅଭିଯାନ ଆରମ୍ଭ କରିଛନ୍ତି ତାହା ଓଡିଶାରେ ବେଶ୍‍ ଫଳପ୍ରଦ ହୋଇଛି । ରାଜ୍ୟ କୃଷି ବିଭାଗ ସିଧାସଳଖ ଭାବେ ରାଷ୍ଟ୍ରୀୟ କୃଷି ବିକାଶ ଯୋଜନାରେ ୨୨ଟି ଜିଲ୍ଲାରେ ଏହି କାର୍ଯ୍ୟକ୍ରମ ଚଳାଇଛି ।

ମୟୁରଭଞ୍ଜ, ବାଲେଶ୍ୱର, ଭଦ୍ରକ, ବରଗଡ, ବଲାଙ୍ଗିର, ବୌଦ, ସମ୍ବଲପୁର, ସୋନପୁର, ଗଞ୍ଜାମ, ଗଜପତି, ରାୟଗଡା, କଳାହାଣ୍ଡି, କୋରାପୁଟ, ନବରଙ୍ଗପୁର, ନୟାଗଡ, ପୁରୀ, ଖୋରଧା, କେନ୍ଦ୍ରାପଡା, ଜଗତ୍‍ସିଂହପୁର, ଯାଜପୁର, କଟକ ଓ ଢେଙ୍କାନାଳ ଜିଲ୍ଲାକୁ ଏହି କାର୍ଯ୍ୟକ୍ରମର ଅର୍ନ୍ତଭୁକ୍ତ କରାଯାଇଥିବାବେଳେ ଚଳିତବର୍ଷ ଏଥିରେ ୧୦୧ କୋଟି ୮୮ଲକ୍ଷ ଟଙ୍କା ବ୍ୟୟ କରାଯିବ ।

ଏଥି ମଧ୍ୟରୁ କେନ୍ଦ୍ର ସରକାର ୬୧କୋଟି ୧୩ ଲକ୍ଷ ବହନ କରୁଥିବାବେଳେ ରାଜ୍ୟ ସରକାର ୪୩ କୋଟି ୭୫ଲକ୍ଷ ଟଙ୍କା ବହନ କରିବେ ।

ଉକ୍ତ କାର୍ଯ୍ୟକ୍ରମର ଅଗ୍ରଗତି ସମ୍ପର୍କରେ କୃଷି ଉତ୍ପାଦନ କମିଶନର ଗଗନ କୁମାର ଧଳ ଏକ ଉଚ୍ଚସ୍ତରୀୟ ସମୀକ୍ଷା ବୈଠକ କରିଛନ୍ତି । ବିଭାଗର ବରିଷ୍ଠ ଅଧିକାରୀମାନେ ଏଥିରେ ଯୋଗଦେଇ ଗତବର୍ଷ ଉକ୍ତ କାର୍ଯ୍ୟକ୍ରମ ସମ୍ପର୍କରେ ମତ ରଖିଥିଲେ ।

ଏହି କାର୍ଯ୍ୟକ୍ରମ ଅଧିନରେ ଗତବର୍ଷ ୩୭,୪୧୨ ହେକ୍ଟର ଜମିରେ ଚାଷ କରାଯାଇଥିଲା ଓ ସେଥିରେ ଧାନ ଉତ୍ପାଦନ ୨୭ପ୍ରତିଶତରୁ ଅଧିକ ହୋଇଥିବା ଜଣାପଡିଛି । ଗୋଟିଏ ଗୋଟିଏ ଅଞ୍ଚଳରେ ୧୦୦ ଏକର କିମ୍ବା ତଦୁର୍ଧ ଚାଷଜମିରେ ଏହି ନିରୀକ୍ଷା ଚାଲିଛି ।

ଏଥିରେ ଧାନ ବିହନ ଉତ୍ପାଦନ, ଧାଡି ରୁଆ, ପ୍ରାକୃତିକ ବିପର୍ଯ୍ୟୟ ଓ ରୋଗପୋକ ଦାଉରୁ ବର୍ତ୍ତି ପାରୁଥିବା ଧାନଚାଷ, ଯାନ୍ତ୍ରିକ କୃଷି ଆଦିକୁ ପ୍ରାଧାନ୍ୟ ଦିଆଯାଉଛି ।

ସମୀକ୍ଷା ବୈଠକରୁ ଜଣାପଡିଛି ଯେ ସଘନ ପ୍ରଣାଳୀରେ ହେଉଥିବା ଏହି ପରୀକ୍ଷାମୂଳକ ଚାଷରୁ ଗତବର୍ଷ ୨୧,୧୮୧ କୁଇଣ୍ଟାଲ ବିହନ ଉତ୍ପାଦନ ପାଇଁ ଲକ୍ଷ୍ୟ ରଖାଯାଇଥିବାବେଳେ ବାସ୍ତବରେ କିନ୍ତୁ ରେକର୍ଡ ପରିମାଣର ୪୩,୪୫୩ କୁଇଣ୍ଟାଲ ବିହନ ଉତ୍ପାଦିତ ହୋଇଛି ।

ବିଗତ ବର୍ଷର ସଫଳତାକୁ ଆଖିଆଗରେ ରଖି ଚଳିତବର୍ଷ ଏହି କାର୍ଯ୍ୟକ୍ରମ କୃଷି କ୍ଷେତରେ ଯେଭଳି ଅଧିକ ଫଳପ୍ରଦ ହୋଇପାରିବ ସେ ସଂକ୍ରାନ୍ତରେ ଏହି ବୈଠକରେ ବିସ୍ତୃତ ଆଲୋଚନା କରାଯାଇଛି ।