ସଚିବାଳୟ ମାର୍ଗର ନାମ ପରିବର୍ତ୍ତନ  ନୂଆ ନାମ ହେଲା ଲୋକସେବା ମାର୍ଗ  ସଚିବାଳୟର ନାମ ଲୋକସେବା ଭବନ ହେବାପରେ ରାସ୍ତାର ନାମ ବି ବଦଳିଲା  ଏଜି ଛକରୁ ଆଚାର୍ଯ୍ୟ ବିହାର ରାସ୍ତାର ନାମ ଏଣିକି ଲୋକସେବା ମାର୍ଗ  

ଡିସେମ୍ବର ୧ରୁ ଯାଞ୍ଚ କଡ଼ାକଡ଼ି

ଡିସେମ୍ବର ୧ ତାରିଖରୁ ନୂଆ ପରିବହନ ଆଇନ ଅନୁଯାୟୀ ଗାଡ଼ି ମୋଟରଗୁଡ଼ିକର ଯାଞ୍ଚ ପୁଣି ପୂର୍ବ ଭଳି କଡାକଡି ହେବ । ସେପ୍ଟେମ୍ବର ପହିଲାରୁ ଯେଭଳି ଭାବେ ପୁଲିସ ଓ ପରିବହନ ବିଭାଗ ପକ୍ଷରୁ କଡା ଯାଞ୍ଚ ହେଉଥିଲା, ପୁଣି ସେଭଳି ତନଖି ଆରମ୍ଭ ହେବ ବୋଲି ପରିବହନ ମନ୍ତ୍ରୀ ପଦ୍ମନାଭ ବେହେରା କହିଛନ୍ତି ।

ଓଡ଼ିଶା ସମେତ ସମଗ୍ର ଦେଶରେ ସେପ୍ଟେମ୍ବର ୧ରୁ ସଂଶୋଧିତ ମୋଟର ଯାନ ଆଇନ୍ ୨୦୧୯ ଲାଗୁ ହୋଇଥିଲା । ଏହି ଆଇନକୁ କଡ଼ାକଡ଼ି କାର୍ଯ୍ୟକାରୀ କରାଯିବା ଓ ନିୟମାନୁସାରେ ଗାଡ଼ିର ସବୁ କାଗଜପତ୍ର ଠିକ୍ ନ ଥିଲେ ଜରିମାନା ଆଦାୟ ହେବା ପରେ ଲୋକଙ୍କ ମଧ୍ୟରେ କୋକୁଆ ଭୟ ସୃଷ୍ଟି ହୋଇଥିଲା ।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନୂଆ ମୋଟର ଯାନ ଆଇନ ଲାଗୁ ନେଇ ଚାଲିଥିବା ଧରପଗଡ଼ ଉପରେ ୩ ମାସ କୋହଳ ଲାଗି ନିର୍ଦ୍ଦେଶ ଦେଇଥିବା ବେଳେ ତାହା ନଭେମ୍ବର ୩୦ ତାରିଖରେ ଶେଷ ହେବାକୁ ଯାଉଛି । ଫଳରେ ରାଜ୍ୟରେ ପୁଣି ଗାଡ଼ିମଟରର କଡାକଡି ଯାଞ୍ଚ ଆରମ୍ଭ ହେବ । ଟ୍ରାଫିକ ନିୟମ ଉଲ୍ଲଙ୍ଘନ କଲେ ନୂଆ ମୋଟରଯାନ ଆଇନ ଅନୁସାରେ ଜରିମାନା ଆଦାୟ କରାଯିବ ବୋଲି ମନ୍ତ୍ରୀ ଶ୍ରୀ ବେହେରା ସ୍ପଷ୍ଟ କରିଛନ୍ତି ।

ନୂଆ ମୋଟର ଯାନ ଆଇନ ଲାଗୁ ପରେ ଟ୍ରାଫିକ ନିୟମ କଡାକଡି ହେବା ପରେ ଏ ନେଇ ଜନସାଧାରଣ ସମ୍ପୂର୍ଣ୍ଣ ଅବଗତ ନ ଥିବା ହେତୁ ବିଭିନ୍ନ ସ୍ଥାନରେ ଜନଅସନ୍ତୋଷ ଦେଖା ଦେଇଥିଲା । ଖୋଦ ରାଜଧାନୀ ଭୁବନେଶ୍ୱରରେ ଜନତା-ପୁଲିସ ମୁହାଁମୁହିଁ ହୋଇଥିଲେ ।

ତେବେ ନୂଆ ଆଇନ ଲାଗୁ ହେବାର ଦୁଇ ମାସ ମଧ୍ୟରେ ରାଜ୍ୟରେ ୧ କୋଟିରୁ ଊଦ୍ଧ୍ୱର୍ ଟଙ୍କାର ଜରିମାନା ଆଦାୟ ହୋଇଥିଲା । ବିନା ଡ୍ରାଇଭିଂ ଲାଇସେନ୍ସରେ ଗାଡ଼ିଚାଳନା, ପ୍ରଦୂଷଣ ପ୍ରମାଣପତ୍ର ନ ଥିବା ଓ ନିଶା ସେବନ କରି ଗାଡ଼ି ଚଳାଉଥିବା ଲୋକେ ମୋଟା ଅଙ୍କର ତଣ୍ଡ ଗଣୁଥିଲେ ।

ଗାଡ଼ି ମଟରର କଡ଼ାକଡ଼ି ଯାଞ୍ଚ ଯୋଗୁ ବିପୁଳ ଜରିମାନା ଆଦାୟ ସହିତ ଦୁର୍ଘଟଣାର ପରିମାଣ ହ୍ରାସ ପାଇଥିଲା । ସରକାରଙ୍କ ହିସାବ ଅନୁଯାୟୀ ୨୦୧୮ ମସିହାରେ କେବଳ ସେପ୍ଟେମ୍ବର ମାସରେ ୮୪୪ ଦୁର୍ଘଟଣା ଘଟିଥିବା ବେଳେ ଚଳିତ ମାସ ସେପ୍ଟେମ୍ବର ମାସରେ ଏହା ୭୦୨କୁ ହ୍ରାସ ପାଇଥିଲା ।

ସମଗ୍ର ରାଜ୍ୟରେ ୧୩ ପ୍ରତିଶତ ହାରରେ ଦୁର୍ଘଟଣା ବୃଦ୍ଧି ପାଉଥିବା ବେଳେ ଗୋଟିଏ ମାସରେ କିନ୍ତୁ ଗାଡ଼ିମଟର ଯାଞ୍ଚ ଯୋଗୁ ଏହା ୧୬.୮୨ ପ୍ରତିଶତ ହ୍ରାସ ପାଇଥିଲା ।  



ସମ୍ପାଦକ: ବ୍ରଜ କିଶୋର ମିଶ୍ର

©Tathya Media Pvt. Ltd. 2019