ପୁରୀରେ ଦ୍ୱିତୀୟ ବିମ୍ସଟେକ

ଆସନ୍ତା ବର୍ଷ ଫେବୃଆରୀ ୧୧ରୁ ୧୩ ତାରିଖ ପର୍ଯ୍ୟନ୍ତ ‘ବିମ୍ସଟେକ ବିପର୍ଯ୍ୟୟ ପ୍ରଶମନ ଅଭ୍ୟାସ-୨୦୨୦’ ପୁରୀ ଠାରେ ଅନୁଷ୍ଠିତହେବ ।ଏହାର ପ୍ରଥମ ପର୍ଯ୍ୟାୟ ଆରମ୍ଭ ହୋଇଯାଇଛି ।ଏହି ପର୍ଯ୍ୟାୟରେ ପ୍ରସ୍ତୁତି ବୈଠକ ଏବଂ ମୁଖ୍ୟ ଅଭ୍ୟାସ ପାଇଁ କ୍ଷେତ୍ରୀୟ ତାଲିମ ଅଭ୍ୟାସ ସ୍ଥାନ ଚୟନ କରାଯିବ ।

ନୋଡାଲ ଏଜେନ୍ସି ଭାବେ ଜାତୀୟ ବିପର୍ଯ୍ୟୟ ପ୍ରଶମନ ବାହିନୀ (ଏନଡିଆରଏଫ) ଦ୍ୱାରାଏହି ଅଭ୍ୟାସ ଆୟୋଜନ କରାଯାଉଛି । ଏହି ଅଭ୍ୟାସର ବିଷୟବସ୍ତୁ- “ଭୂମିକମ୍ପ ଦ୍ୱାରା ଗୁରୁତର ଭାବେ କ୍ଷତିଗ୍ରସ୍ତ ହେଉଥିବା ସାଂସ୍କୃତିକ ଐତିହ୍ୟସ୍ଥଳୀର ସୁରକ୍ଷା ଏବଂ ବନ୍ୟା ଓ ଝଡ଼ ଦ୍ୱାରା ପ୍ରଭାବିତ ସାଂସ୍କୃତିକ ଐତିହ୍ୟସ୍ଥଳୀର ସୁରକ୍ଷା” ରଖାଯାଇଛି ।

ଏଥି ନିମନ୍ତେ ପୁରୀରେ ବିପର୍ଯ୍ୟୟ ପ୍ରଶମନ କ୍ଷେତ୍ରରେ ବହୁପକ୍ଷୀୟ ବୈଷୟିକ ଓ ଆର୍ଥିକ ସହଯୋଗ ପାଇଁ ଦ୍ୱିତୀୟ ବଙ୍ଗୋପସାଗର ଉପକ୍ରମ (ବିମ୍ସଟେକ ଡିମଇଏକ୍ସ-୨୦୨୦) ଅଭ୍ୟାସର ପ୍ରସ୍ତୁତି ବୈଠକ ଅନୁଷ୍ଠିତ ହୋଇଛି । ପ୍ରସ୍ତୁତି ବୈଠକର ଉଦଘାଟନୀ ଅଧିବେଶନରେ ମୁଖ୍ୟ ଅତିଥି ଭାବେ ଜାତୀୟ ବିପର୍ଯ୍ୟୟ ପ୍ରଶମନ ପ୍ରାଧିକରଣ (ଏନଡିଏମଏ)ର ସଦସ୍ୟ ଅବସରପ୍ରାପ୍ତ ଲେଫ୍ଟନାଂଟ ଜେନେରାଲ ଏନ ସିମାରୱା ଯୋଗ ଦେଇଥିଲେ ।

ବିମ୍ସଟେକ ଡିଏମଇଏକ୍ସ-୨୦୨୦ର ଅଭ୍ୟାସର ପ୍ରକ୍ରିୟା ଓ ଆବଶ୍ୟକତା ଉପରେ ଏହି ପ୍ରସ୍ତୁତି ବୈଠକରେ ଗୁରୁତ୍ୱାରୋପ କରାଯାଇଥିଲା । ସାଂସ୍କୃତିକ ଐତିହ୍ୟସ୍ଥଳୀରେ ବଡ଼ ଭୂମିକମ୍ପ ଏବଂ ଝଡ଼ କିମ୍ବା ବନ୍ୟା ଆସିବା ଦ୍ୱାରା ଦେଖାଦେଉଥିବା ଜରୁରି ପରିସ୍ଥିତିର ସମନ୍ୱିତ ଢଙ୍ଗରେ ମୁକାବିଲା ଲାଗି ପ୍ରସ୍ତୁତି ଓ ପ୍ରଶମନକୁ ଅନୁଧ୍ୟାନ କରିବା ପ୍ରତି ବିମ୍ସଟେକ ଡିଏମଇଏକ୍ସରେ ମୁଖ୍ୟତଃ ଗୁରୁତ୍ୱାରୋପ କରାଯିବ ।

ସୂଚନାଯୋଗ୍ୟ ଯେ ଚତୁର୍ଥ ବିମ୍ସଟେକ ଶିଖର ସମ୍ମିଳନୀ ଅଗଷ୍ଟ, ୨୦୧୮ରେ କାଠମାଣ୍ଡୁ ଠାରେ ଅନୁଷ୍ଠିତ ହୋଇଥିଲା । ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୨୦୧୯-୨୦ରେ ଭାରତରେ ଦ୍ୱିତୀୟ ବିମ୍ସଟେକ ବିପର୍ଯ୍ୟୟ ପ୍ରଶମନ ଅଭ୍ୟାସ ଏବଂ ବିମ୍ସଟେକ ରାଷ୍ଟ୍ରଗୁଡ଼ିକର ଜାତୀୟ ବିପର୍ଯ୍ୟୟ ପ୍ରଶମନ ପ୍ରାଧିକରଣ/ବାହିନୀଗୁଡ଼ିକର ବିଶେଷଜ୍ଞ ଗୋଷ୍ଠୀ ବୈଠକ ଆୟୋଜନ ଲାଗି ପ୍ରସ୍ତାବ ଦେଇଥିଲେ ।


ମୁଖ୍ୟ ଅତିଥି କହିଥିଲେ ଯେ ଗତ ୧୦ ବର୍ଷ ମଧ୍ୟରେ ଏହି କ୍ଷେତ୍ରରେ ସାମୁଦ୍ରିକ ଝଡ଼ର ଆଶଙ୍କା ୩୦% ବୃଦ୍ଧି ପାଇଛି ଏବଂ ସାଂସ୍କୃତିକ ଐତିହ୍ୟ ସ୍ଥଳୀ ଗୁଡ଼ିକ ବ୍ୟାପକଭାବେ କ୍ଷତିଗ୍ରସ୍ତ ହୋଇଛି । ଜଳବାୟୁରେ ନିୟମିତ ପରିବର୍ତନ ତଥା ଐତିହ୍ୟସ୍ଥଳୀଉପରେ ଏହାର ପ୍ରଭାବ ଉପରେ ସେ ରେଖାପାତ କରିବା ସହିତ ଏସବୁ ଐତିହ୍ୟସ୍ଥଳୀର ସୁରକ୍ଷା ପଦକ୍ଷେପ ବିଷୟରେ ଆଲୋଚନା କରିଥିଲେ ।

ରାଜ୍ୟ ସ୍ୱତନ୍ତ୍ର ରିଲିଫ କମିଶନର ପ୍ରଦୀପ କୁମାର ଜେନା ସମ୍ମାନିତ ଅତିଥି ଭାବେ ଯୋଗ ଦେଇ ବିଗତ ୨୦ ବର୍ଷ ମଧ୍ୟରେ ଭାରତରେ ବିପର୍ଯ୍ୟୟ ପ୍ରଶମନ ଏବଂ ବିପର୍ଯ୍ୟୟ ବିପତି ହ୍ରାସ ଦିଗରେ ହୋଇଥିବା ଉଲ୍ଲେଖନୀୟ ଅଗ୍ରଗତି ବିଷୟରେ ଉଲ୍ଲେଖ କରିଥିଲେ । ବାତ୍ୟାର ବେଗ, ମାର୍ଗ, ତୀବ୍ରତା ଓ ପ୍ରଭାବ ସମ୍ପର୍କରେ ଆଗୁଆ ଏବଂ ସଠିକ ସୂଚନା ପ୍ରସାର କରିବାଲାଗି ସେ ଭାରତୀୟ ପାଣିପାଗ ବିଭାଗକୁ ପ୍ରଶଂସା କରିଥିଲେ । ସେହିପରି ବିପର୍ଯ୍ୟୟ ସମୟରେ ଜାତୀୟ ବିପର୍ଯ୍ୟୟ ପ୍ରଶମନ ବାହିନୀ (ଏନଡିଆରଏଫ) ପ୍ରଭାବିତ କ୍ଷେତ୍ରରେ ତୁରନ୍ତ ଉଦ୍ଧାର ଓ ଥଇଥାନ କ୍ଷେତ୍ରରେ ନିୟୋଜିତ ହେବା ଏବଂ ସମସ୍ତ ଅଂଶୀଦାର ତଥା ଏଜେନ୍ସି ମଧ୍ୟରେ ରହିଥିବା ସମନ୍ୱୟକୁ ମଧ୍ୟ ସେ ପ୍ରଶଂସା କରିଥିଲେ ।

୧୯୯୯ ମହାବାତ୍ୟା ଏବଂ ୨୦୧୩ ଫାଇଲିନ ବାତ୍ୟା କ୍ଷୟକ୍ଷତିକୁ ତୁଳନା କରି ଶ୍ରୀ ଜେନା କହିଥିଲେ ଯେ ବିପର୍ଯ୍ୟୟ ପ୍ରଶମନ କ୍ଷେତ୍ରରେ ଆମେ ଏବେ ପ୍ରଯୁକ୍ତି, ସରଞ୍ଜାମ, ଲୋକବଳ ଓ ସମ୍ବଳ ଦୃଷ୍ଟିରୁ ଭଲ ଭାବେ ସୁସଜ୍ଜିତ ଏବଂ ପ୍ରସ୍ତୁତ । ସେକହିଥିଲେ ଯେ ପ୍ରଥମ ରାଜ୍ୟଭାବେ ଓଡ଼ିଶା ନିଜସ୍ୱ ରାଜ୍ୟ ବିପର୍ଯ୍ୟୟ ପ୍ରଶମନ ପ୍ରାଧିକରଣ (ଓସଡମା), ଓଡ଼ିଶା ତ୍ୱରିତ ବିପର୍ଯ୍ୟୟ କାର୍ଯ୍ୟାନୁଷ୍ଠାନ ବାହିନୀ (ଓଡ୍ରାଫ) ଓ ଜିଲ୍ଲା ବିପର୍ଯ୍ୟୟ ପ୍ରଶମନ କର୍ତୃପକ୍ଷ (ଡିଡିଏମଏ) ପ୍ରତିଷ୍ଠା କରିଛି ।

ସ୍ୱାଗତ ଭାଷଣ ଦେଇ ଏନଡିଆରଏଫ ମହାନିର୍ଦ୍ଦେଶକ ସତ୍ୟ ନାରାୟଣ ପ୍ରଧାନ ମହିଥିଲେ ଯେ ଦୁଇ ଦିନିଆ ପ୍ରସ୍ତୁତି ବୈଠକରେ ‘ଦ୍ୱିତୀୟ ବିମ୍ସଟେକ ବିପର୍ଯ୍ୟୟ ପ୍ରଶମନ ଅଭ୍ୟାସ-୨୦୨୦’ର ପ୍ରକ୍ରିୟା ଏବଂ ଆବଶ୍ୟକତା ଚୂଡ଼ାନ୍ତ କରାଯିବ ।

ଏହି ପ୍ରସ୍ତୁତି ବୈଠକରେ ବିମ୍ସଟେକ ସଚିବାଳୟର ନିର୍ଦ୍ଦେଶକ ପଙ୍କଜ ହଜାରିକା, ଭାରତୀୟ ଜାତୀୟ କଳା ଓ ସାଂସ୍କୃତିକ ଐତିହ୍ୟ (ଇନଟାକ)ଟ୍ରଷ୍ଟ, ଭାରତୀୟ ପ୍ରତ୍ନତତ୍ୱ ସର୍ବେକ୍ଷଣ ସଂସ୍ଥା (ଏଏସଆଇ) ଏବଂ ଡୋର୍ସର ପ୍ରତିନିଧିମାନେ ଯୋଗ ଦେଇ ସେମାନଙ୍କ ମତ ଉପସ୍ଥାପନ କରିଥିଲେ ।

ଏହି ବୈଠକରେ ବୈଦେଶିକ ବ୍ୟାପାର ମନ୍ତ୍ରଣାଳୟ, ଏନଡିଏମଏ, ଏନଡିଆରଏଫର ବରିଷ୍ଠ ଅଧିକାରୀଙ୍କ ସମେତ ବାଂଲାଦେଶ, ଭୂଟାନ, ଭାରତ, ନେପାଳ, ଶ୍ରୀଲଙ୍କା, ମ୍ୟାଁମାର ଓ ଥାଇଲାଣ୍ଡ ଆଦି ୭ଟି ବିମ୍ସଟେକ ରାଷ୍ଟ୍ରର ପ୍ରତିନିଧିମାନେ ଯୋଗ ଦେଇଥିଲେ । 



ସମ୍ପାଦକ: ବ୍ରଜ କିଶୋର ମିଶ୍ର

©Tathya Media Pvt. Ltd. 2020