ସଚିବାଳୟ ମାର୍ଗର ନାମ ପରିବର୍ତ୍ତନ  ନୂଆ ନାମ ହେଲା ଲୋକସେବା ମାର୍ଗ  ସଚିବାଳୟର ନାମ ଲୋକସେବା ଭବନ ହେବାପରେ ରାସ୍ତାର ନାମ ବି ବଦଳିଲା  ଏଜି ଛକରୁ ଆଚାର୍ଯ୍ୟ ବିହାର ରାସ୍ତାର ନାମ ଏଣିକି ଲୋକସେବା ମାର୍ଗ  

ଖାଲି ପଡିଛି ପଦବୀ


ବିଶ୍ୱବିଦ୍ୟାଳୟ ସ୍ତରରେ ଶିକ୍ଷକ ପଦବୀ ଖାଲି କ୍ଷେତ୍ରରେ ରେଭେନ୍ସା ବିଶ୍ୱବିଦ୍ୟାଳୟ ସବୁଠୁ ଆଗରେ ରହିଛି । ଏହି ବିଶ୍ୱବିଦ୍ୟାଳୟରେ ସର୍ବାଧିକ ୧୭୯ଶିକ୍ଷକ ପଦବୀ ଖାଲିଥିବାବେଳେ ଏହା ପଛକୁ ଦ୍ୱିତୀୟ ସ୍ଥାନରେ ରହିଛି ଗଙ୍ଗାଧର ମେହେର ବିଶ୍ୱବିଦ୍ୟାଳୟ ।

ବିଶ୍ୱବିଦ୍ୟାଳୟ ଗୁଡିକରେ ଶିକ୍ଷକ ପଦବୀ ଖାଲି ସଂକ୍ରାନ୍ତରେ ବିଧାୟକ ପ୍ରଶାନ୍ତ ବେହେରାଙ୍କ ଏକ ପ୍ରଶ୍ନର ଉତ୍ତରରେ ଏହି ସୂଚନା ଦେଇଛନ୍ତି ଉଚ୍ଚଶିକ୍ଷା ମନ୍ତ୍ରୀ ଡକ୍ଟର ଅରୁଣ କୁମାର ସାହୁ । ମନ୍ତ୍ରୀ ତାଙ୍କ ଉତ୍ତରରେ ଦର୍ଶାଇଛନ୍ତି ଯେ ରାଜ୍ୟର ୧୦ଟି ସରକାରୀ ବିଶ୍ୱବିଦ୍ୟାଳୟରେ ୮୪୪ଟି ଶିକ୍ଷକ ପଦବୀ ଖାଲି ପଡିଛି । ତେବେ ରେଭେନ୍ସାରେ ସର୍ବାଧିକ ୧୭୯ ପଦବୀ ଖାଲିଥିବାବେଳେ ଏଥି ମଧ୍ୟରୁ ୧୦୭ଟି ଆସିଷ୍ଟାଣ୍ଟ ପ୍ରଫେସର, ୪୮ଟି ଆସୋସିଏଟ ପ୍ରଫେସର ଓ ୨୪ଟି ପ୍ରଫେସର ପଦବୀ ରହିଛି । ସେହିଭଳି ଗଙ୍ଗାଧର ମେହେର ବିଶ୍ୱବିଦ୍ୟାଳରେ ମୋଟ୍‍ ୧୨୯ଟି ଶିକ୍ଷକ ପଦବୀ ଖାଲିଥିବାବେଳେ କେଉଁ ବର୍ଗରେ କେତେ ତାହା ଉଲ୍ଲେଖ କରାଯାଇ ନାହିଁ ।

ଉତ୍‍କଳ ବିଶ୍ୱବିଦ୍ୟାଳୟରେ ଖାଲି ପଡିଥିବା ୧୨୦ଟି ଶିକ୍ଷକ ପଦବୀ ମଧ୍ୟର ୪୭ଟି ଆସିଷ୍ଟାଣ୍ଟ ପ୍ରଫେସର ପଦବୀ ଥିବାବେଳେ ୪୨ଟି ଆସୋସିଏଟ ପ୍ରଫେସର ଓ ୩୧ଟି ପ୍ରଫେସର ପଦବୀ ରହିଛି । ତୃତୀୟ ସ୍ଥାନରେ ରହିଛି ରମାଦେବୀ ବିଶ୍ୱବିଦ୍ୟାଳୟ । ଏହି ଶିକ୍ଷାନୁଷ୍ଠାନରେ ଖାଲି ପଡିଥିବା ୧୦୫ ଶିକ୍ଷକ ପଦବୀ ମଧ୍ୟରୁ ୬୮ଟି ଆସିଷ୍ଟାଣ୍ଟ ପ୍ରଫେସର ପଦବୀ ଥିବାବେଳେ ୨୮ଟି ଆସୋସିଏଟ ପ୍ରଫେସର ଓ ୯ଟି ପ୍ରଫେସର ପଦବୀ ଖାଲି ରହିଛି ।

ସେହିଭଳି ଉତ୍ତର ଓଡିଶା ବିଶ୍ୱବିଦ୍ୟାଳୟରେ ୭୯ଟି ଶିକ୍ଷକ ପଦବୀ ଖାଲି ପଡିଥିବାବେଳେ, ଫକୀର ମୋହନ ଓ ବ୍ରହ୍ମପୁର ବିଶ୍ୱବିଦ୍ୟାଳୟରେ ୭୨ଟି କରି, ସମ୍ବଲପୁର ବିଶ୍ୱବିଦ୍ୟାଳୟରେ ୫୧, ଶ୍ରୀଜଗନ୍ନାଥ ସଂସ୍କୃତ ବିଶ୍ୱବିଦ୍ୟାଳୟରେ ୨୫ ଓ ଖଲିକୋଟ ବିଶ୍ୱବିଦ୍ୟାଳୟରେ ୧୨ଟି ଶିକ୍ଷକ ପଦବୀ ଖାଲି ରହିଛି ।

ଶିକ୍ଷକ ପଦବୀ ଭଳି ଏହିସବୁ ବିଶ୍ୱବିଦ୍ୟାଳୟ ଗୁଡିକରେ ୧୫୬୩ଟି ଅଣଶିକ୍ଷକ ପଦନବୀ ଖାଲି ପଡିଛି । ଅଣଶିକ୍ଷକ ପଦବୀ ଖାଲି କ୍ଷେତ୍ରରେ ଉତ୍‍କଳ ବିଶ୍ୱବିଦ୍ୟାଳୟ ସବୁଠାରୁ ଆଗରେ ରହିଛି । ଏଠାରେ ସମୁଦାୟ ୬୧୩ଟି ପଦବୀ ଖାଲି ପଡିଥିବାବେଳେ ଏଥି ମଧ୍ୟରେ ଚତୁର୍ଥଶ୍ରେଣୀ ପାହ୍ୟାରେ ୩୨୧, ତୃତୀୟଶ୍ରେଣୀରେ ୨୨୨, ଦ୍ୱିତୀୟଶ୍ରେଣୀରେ ୬୨ ଓ ପ୍ରଥମଶ୍ରେଣୀ ପାହ୍ୟାର ୮ଟି ପଦବୀ ଖାଲି ରହିଛି ।

ସେହିଭଳି ସମ୍ବଲପୁର ବିଶ୍ୱବିଦ୍ୟାଳୟରେ ୨୯୫ଟି ଅଣଶିକ୍ଷକ ପଦବୀ ଖାଲି ପଡିଥିବାବେଳେ ବ୍ରହ୍ମପୁର ବିଶ୍ୱବିଦ୍ୟାଳୟରେ ୨୦୭, ରେଭେନ୍ସାରେ ୧୩୫ ଟି ପଦବୀ ଖାଲି ପଡିଛି । ଅନ୍ୟ ବିଶ୍ୱବିଦ୍ୟାଳୟ ଗୁଡିକରେ ଖାଲି ପଡିଥିବା ଅଣଶିକ୍ଷକ ପଦବୀ ସଂଖ୍ୟା ଶହେ ତଳକୁ ଥିବାବେଳେ ଓଡିଶା ମୁକ୍ତ ବିଶ୍ୱ ବିଦ୍ୟାଳୟରେ ଏହି ସଂଖ୍ୟା ସବୁଠାରୁ କମ୍‍ ୨ ରହିଥିବା ମନ୍ତ୍ରୀ ତାଙ୍କ ଉତ୍ତରରେ ଉଲ୍ଲେଖ କରିଛନ୍ତି ।  



ସମ୍ପାଦକ: ବ୍ରଜ କିଶୋର ମିଶ୍ର

©Tathya Media Pvt. Ltd. 2019