ସଚିବାଳୟ ମାର୍ଗର ନାମ ପରିବର୍ତ୍ତନ  ନୂଆ ନାମ ହେଲା ଲୋକସେବା ମାର୍ଗ  ସଚିବାଳୟର ନାମ ଲୋକସେବା ଭବନ ହେବାପରେ ରାସ୍ତାର ନାମ ବି ବଦଳିଲା  ଏଜି ଛକରୁ ଆଚାର୍ଯ୍ୟ ବିହାର ରାସ୍ତାର ନାମ ଏଣିକି ଲୋକସେବା ମାର୍ଗ  

କମିଟି ନଗଢିଲେ ତଣ୍ଡ


ଧାର୍ଯ୍ୟ ସମୟ ମଧ୍ୟରେ ଓଡ଼ିଶା ସରକାର ତଳ ସ୍ତରରେ ବାୟୋଡାଇଭର୍ସିଟି ମ୍ୟାନେଜମେଣ୍ଟ କମିଟି (ବିଏମ୍‍ସି) ଗଠନ ଏବଂ ପିପୁଲ୍ସ ବାୟୋଡାଇଭର୍ସିଟି ରେଜିଷ୍ଟର୍ସ (ପିବିଆର୍‍) ପ୍ରସ୍ତୁତ ନ କଲେ ମୋଟା ଅଙ୍କର ତଣ୍ଡ ଗଣିବେ ବୋଲି ନ୍ୟାସନାଲ ବାୟୋଡାଇଭର୍ସିଟି ଅଥରିଟି(ଏନ୍‍ବିଏ) ଚେତାଇ ଦେଇଛି । ଜରିମାନା ବାବଦରେ ରାଜ୍ୟ ସରକାର ମାସକୁ ୧୦ ଲକ୍ଷ ଟଙ୍କା କରି କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (ସିପିସିବି)କୁ ଜୋରିମାନା ଦେବେ ଓ ଏହି ଅର୍ଥ ପରିବେଶ ସଂରକ୍ଷଣ ପାଇଁ ଖର୍ଚ୍ଚ ହେବ ବୋଲି ଏନ୍‍ବିଏ କହିଛି ।

ବିଏମ୍‍ସି ଓ ପିବିଆର୍‍ ଲାଗି ଆସନ୍ତାବର୍ଷ ଜାନୁଆରୀ ୩୧କୁ ସମୟ ଧାର୍ଯ୍ୟ ହୋଇଥିବା ବେଳେ ଏହାପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଏନ୍‍ବିଏ କହିଛି । ଜାତୀୟ ଗ୍ରୀନ୍‍ ଟିବ୍ୟୁନାଲର ନିର୍ଦ୍ଦେଶକୁ କାର୍ଯ୍ୟକାରୀ କରିବା ପାଇଁ ଏନ୍‍ବିଏ ପକ୍ଷରୁ ରାଜ୍ୟ ସରକାରମାନଙ୍କୁ ବିଏମ୍‍ସି ଓ ପିବିଆର୍‍ ପ୍ରସ୍ତୁତ ସଂକ୍ରାନ୍ତରେ ଆସନ୍ତା ୩୧ ତାରିଖ ସୁଦ୍ଧା ରିପୋର୍ଟ ଦେବାକୁ କହିଛନ୍ତି । ଓଡ଼ିଶାରେ ଯଦିଓ ରାଜ୍ୟ ଜୈବ ବିବିଧତା ବୋର୍ଡ ରହିଛି କିନ୍ତୁ ତଳସ୍ତରରେ ବିଏମ୍‍ସି ଗଠନ ପ୍ରକ୍ରିୟା ତ୍ୱରାନ୍ୱିତ ହୋଇପାରୁନାହିଁ ।

ସରକାରୀ ତଥ୍ୟ ମୁତାବକ ରାଜ୍ୟର ୭୨୫୯ଟି ପୌରସଂସ୍ଥା ଓ ପଞ୍ଚାୟତିରାଜ ଅନୁଷ୍ଠାନ ରହିଛି । ଏଥିମଧ୍ୟରୁ ୩୭୧୦ରେ ବିଏମ୍‍ସି ଗଠନ ହୋଇଛି ଯାହାକି ମାତ୍ର ୫୧ ପ୍ରତିଶତ । ଅନ୍ୟପକ୍ଷରେ ୧୧୧ଟି ପୌରସଂସ୍ଥାରେ ପିବିଆର୍‍ ପ୍ରସ୍ତୁତି ଚାଲିଥିବା ବେଳେ ଏପର୍ଯ୍ୟନ୍ତ ତାହା ହୋଇପାରିନାହିଁ । ଉଭୟ ସହରାଞ୍ଚଳ ଓ ଗ୍ରାମାଞ୍ଚଳରେ ଥିବା ସଂସ୍ଥାଗୁଡ଼ିକରେ ୨୦୨୦ ଜାନୁଆରୀ ୩୧ ପୂର୍ବରୁ ବିଏମ୍‍ସି ଗଠନ ନ ହେଲେ କିମ୍ବା ପିବିଆର୍‍ ପ୍ରସ୍ତୁତ ନ ହେଲେ ପ୍ରତି ମାସରେ ରାଜ୍ୟ ସରକାରଙ୍କୁ ୧୦ ଲକ୍ଷ ଟଙ୍କାର ଜରିମାନା ଦେବାକୁ ପଡ଼ିବ ।

ପ୍ରାକୃତିକ ସମ୍ପଦର ସଂରକ୍ଷଣ ଓ ଉପଯୁକ୍ତ ବ୍ୟବହାର ପାଇଁ ବିଏମ୍‍ସି ଗଠନର ଆବଶ୍ୟକତା ଥିବା ବେଳେ କାଗଜପତ୍ର ପ୍ରସ୍ତୁତି ପାଇଁ ପିବିଆର୍‍ ଆବଶ୍ୟକ । ଜାତୀୟ ଗ୍ରୀନ୍‍ ଟ୍ରିବ୍ୟୁନାଲର ଅଧ୍ୟକ୍ଷ ଜଷ୍ଟିସ ଆଦର୍ଶ କୁମାର ଗୋଏଲଙ୍କ ଅଧ୍ୟକ୍ଷତାରେ ଗଠିତ ବେଞ୍ଚ ଏହି ନିର୍ଦ୍ଦେଶନାମା ଜାରି କରିଛନ୍ତି ।

ଜୈବ ବିବିଧତା ଆଇନ୍‍ ୨୦୦୨ ଏବଂ ନିୟମାବଳୀ ୨୦୦୪କୁ ଠିକଣା ଭାବେ କାର୍ଯ୍ୟକାରୀ କରିବା ନେଇ ହୋଇଥିବା ଆବେଦନର ବିଚାର କରି ପରିବେଶ, ଜଙ୍ଗଲ ଓ ଜଳବାୟୁ ପରିବର୍ତ୍ତନ ମନ୍ତ୍ରାଳୟକୁ ଏହି ନିର୍ଦ୍ଦେଶ ଦିଆଯାଇଛି । ମନ୍ତ୍ରାଳୟ ପକ୍ଷରୁ ରାଜ୍ୟ ସରକାରମାନଙ୍କୁ ବିଏମ୍‍ସି ଗଠନ ଓ ପିବିଆର୍‍ ପ୍ରସ୍ତୁତ ଲାଗି ଅବଗତ କରିବାକୁ ଏନ୍‍ବିଏକୁ ନିର୍ଦ୍ଦେଶ ଦିଆଯାଇଛି ।

ଜୈବ ବିବିଧତା ଆଇନ୍‍ ୨୦୦୨ ଦ୍ୱାରା ଦେଶରେ ଜୈବ ବିବିଧତାକୁ ସଂରକ୍ଷଣ କରାଯିବା ସହିତ ପାରମ୍ପାରିକ ଜୈବ ସମ୍ପଦ ଓ ଜ୍ଞାନକୌଶଳରୁ ଯେଭଳି ଲାଭ ମିଳିପାରିବ ସେଥିପାଇଁ ଜ୍ଞାନକୌଶଳ ଯୋଗାଇବାରେ ସହାୟତା କରିବାକୁ କୁହାଯାଇଛି । ଏହି ଆଇନ୍‍ରେ ଧାରା ୪୧ ଅନୁଯାୟୀ ତଳସ୍ତରରେ ବିଏମ୍‍ସି ଗଠନ କରାଯିବ ଏବଂ ଏହାଦ୍ୱାରା ଜୈବ ବିବିଧତାର ସଂରକ୍ଷଣକୁ ପ୍ରୋତ୍ସାହନ ସହିତ ସଠିକ୍‍ ବ୍ୟବହାର ଆଦି ହୋଇପାରିବ ।

କେତେକ ରାଜ୍ୟରେ ଥିବା ବିଏମ୍‍ସି ଦ୍ୱାରା ଜୈବ ବିବିଧତାର କୌଣସି ରେକର୍ଡ ପ୍ରସ୍ତୁତ ହୋଇନଥିବା ଜଣାଯାଇଛି । ବର୍ତ୍ତମାନ ରାଜ୍ୟରେ ଥିବା ଜୈବ ବିବିଧତା ବୋର୍ଡ ଅଧିକ ସକ୍ରିୟ ହୋଇ ବିଏମ୍‍ସି ଗଠନ ଏବଂ ପିବିଆର୍‍ ପ୍ରସ୍ତୁତି ଦିଗରେ ପଦକ୍ଷେପ ଗ୍ରହଣ କରିବ ଯାହାଫଳରେ ରାଜ୍ୟ ସରକାର ମୋଟା ଅଙ୍କର ତଣ୍ଡର ସମ୍ମୁଖୀନ ହେବେ ନାହିଁ ।  



ସମ୍ପାଦକ: ବ୍ରଜ କିଶୋର ମିଶ୍ର

©Tathya Media Pvt. Ltd. 2019