ଗୋଟିଏ ଦିନରେ କରୋନାରେ ରେକର୍ଡ ୧୩ ମୃତ  ରାଜ୍ୟରେ ମୋଟ୍‍ କରୋନା ମୃତ୍ୟୁସଂଖ୍ୟା ୨୭୨  ଗଞ୍ଜାମରେ ସର୍ବାଧିକ ୬ଜଣ ମୃତ  ୪୬ହଜାର ଛୁଇଁଲା କରୋନା ଆକ୍ରାନ୍ତଙ୍କ ତାଲିକା  ଗୋଟିଏ ଦିନର ୨୯ ଜିଲ୍ଲାରୁ ୧୭୩୪ ନୂଆ ଆକ୍ରାନ୍ତ ଚିହ୍ନଟ  ମୋଟ ଆକ୍ରାନ୍ତଙ୍କ ସଂଖ୍ୟା ୪୫,୯୨୭  ଖୋରଧାରେ ସର୍ବାଧିକ ୩୪୨ ଆକ୍ରାନ୍ତ ଚିହ୍ନଟ  ଗଞ୍ଜାମରେ ୨୨୨, କଟକରେ ୧୭୭, ସୁନ୍ଦରଗଡରେ ୧୨୬ ଓ ନୟାଗଡରେ ୧୦୬ ଚିହ୍ନଟ  

କର୍କଟ ରୋଗୀଙ୍କ ଦାବି


କର୍କଟ ଚିକିତ୍ସା ପାଇଁ ମୁମ୍ବାଇ ଯାଉଥିବା ଓଡିଶା ଲୋକଙ୍କ ପାଇଁ ନଭିମୁମ୍ବାଇରେ ଥିବା ଓଡିଶା ଭବନରେ କୋଠରୀ ଅଭାବ ପଡୁଛି । ଏହି ଭବନରେ କର୍କଟରୋଗୀଙ୍କ ପାଇଁ ପ୍ରାୟ ୧୬ଟି କୋଠରୀ ଓ ଗୋଟିଏ ବଡ ହଲ୍‍ ଯୋଗା ଯାଉଥିବାବେଳେ ତାହା ପର୍ଯ୍ୟାପ୍ତ ହେଉନାହିଁ । ତେଣୁ ସେଠାରେ ଅଧିକ ସ୍ଥାନର ବ୍ୟବସ୍ଥା ଲାଗି ଦାବି ହେଉଛି ।

ଓଡିଶାର କର୍କଟରୋଗୀମାନେ ସାଧାରଣତଃ ମୁମ୍ବାଇସ୍ଥିତ ଟାଟା ମେମୋରିଆଲ କର୍କଟ ଡାକ୍ତରଖାନାକୁ ଚିକିତ୍ସାପାଇଁ ଯାଇଥାନ୍ତି । ଏହି ରୋଗୀମାନେ କିଭଳି ସୁବିଧାରେ ବ୍ୟୟବହୁଳ ମୁମ୍ବାଇରେ ରହି ଚିକିତ୍ସିତ ହେବେ ସେଥିପାଇଁ ରାଜ୍ୟ ସରକାର ଓଡିଶା ଭବନରେ ବ୍ୟବସ୍ଥା କରିଛନ୍ତି । ଏଥିପାଇଁ ଗୃହ ବିଭାଗ ନିକଟରେ ଆବେଦନ କରିବାକୁ ପଡିଥାଏ । କର୍କଟରୋଗୀମାନେ ଚିକିତ୍ସାର ସମସ୍ତ ପ୍ରମାଣପତ୍ର ସହିତ ଆବେଦନକଲେ ତାଙ୍କୁ ଓଡିଶା ଭବନରେ ରହିବାକୁ ସୁଯୋଗ ମିଳିଥାଏ ।

ତେବେ ଦିନକୁ ଦିନ ଆବେଦନ କର୍କଟରୋଗୀଙ୍କ ସଂଖ୍ୟା ବୃଦ୍ଧି ପାଉଥିବାବେଳେ ସମସ୍ତଙ୍କୁ ଓଡିଶା ଭବନରେ ସ୍ଥାନ ଦେବା ସହଜ ହେଉନାହିଁ । ତେଣୁ ଓଡିଶା ଭବନ ପରିସରରେ ଅଧିକ କୋଠରୀ ନିର୍ମାଣ ପାଇଁ ଦାବି ହେଉଛି । ଉଲ୍ଲେଖନୀୟ ଯେ ମୁମ୍ବାଇରେ ଗୋଟିଏ ଦିନ ରହି ଚିକିତ୍ସା ହେବାଲାଗି ଅତି କମ୍‍ରେ ୨ରୁ ୩ହଜାର ଟଙ୍କା ଘରଭଡା ଦେବାକୁ ପଡୁଥିବାବେଳେ ରାଜ୍ୟ ସରକାର କର୍କଟରୋଗୀମାନଙ୍କୁ ମାତ୍ର ୩୦୦ ଟଙ୍କାରେ ଓଡିଶା ଭବନରେ ରହିବାର ସୁବିଧା କରିଛନ୍ତି । ଜଣେ ରୋଗୀଙ୍କ ସର୍ବାଧିକ ୩୦ଦିନ ପର୍ଯ୍ୟନ୍ତ ରହିବାର ସୁବିଧା ମିଳୁଛି ।

ଗୋଟିଏ ପଟେ ଶସ୍ତାରେ ରହିବା ଏବଂ ଅନ୍ୟପଟେ ଦେଶର ଅତ୍ୟାଧୁନିକ କର୍କଟ ଗବେଷଣା ପ୍ରତିଷ୍ଠାନରେ ଚିକିତ୍ସା ସୁବିଧା ମିଳୁଥିବାରୁ ଲୋକେ ଅଧିକ ସଂଖ୍ୟାରେ ସେଠାକୁ ଯିବାପାଇଁ ଆଗ୍ରହୀ ହେଉଛନ୍ତି । ସୂଚନା ଅନୁଯାୟୀ କର୍କଟରୋଗୀମାନଙ୍କୁ ଏକ ପ୍ରକାର ମାଗଣାରେ ରହିବାର ବ୍ୟବସ୍ଥା ପାଇଁ ରାଜ୍ୟ ସରକାର ବାର୍ଷିକ ପ୍ରାୟ ୫୦ଲକ୍ଷ ଟଙ୍କା ପର୍ଯ୍ୟନ୍ତ ବ୍ୟୟ କରୁଛନ୍ତି । ଅନ୍ୟ କୌଣସି ରାଜ୍ୟ ସରକାର ମୁମ୍ବାଇ ଠାରେ ଥିବା ସେମାନଙ୍କ ଭବନ କିମ୍ବା ନିବାସରେ କର୍କଟରୋଗୀମାନଙ୍କ ପାଇଁ ଅନୁରୂପ ସେବା ଯୋଗାଉନଥିବା ଜଣାଯାଇଛି ।

ତେବେ ଚାରି ମହଲା ବିଶିଷ୍ଟ ରାଜ୍ୟ ସରକାରଙ୍କର ଏହି ଭବନରେ ଦପ୍ତର ସହିତ ମନ୍ତ୍ରୀ, ଅଫିସର ଆଦିଙ୍କ ରହିବା ବ୍ୟବସ୍ଥା ଥିବାରୁ କର୍କଟରୋଗୀମାନଙ୍କୁ ଚାହିଦା ମୁତାବକ ପ୍ରକୋଷ୍ଠ କିମ୍ବା ସ୍ଥାନ ଦିଆଯାଇ ପାରୁନାହିଁ । ଅନେକ ରୋଗୀ ଆବେନଦ କରି ହତାଶ ହେବା ସହିତ ହୋଟେଲ ଆଦିରେ ରହି ବ୍ୟାପକ ଖର୍ଚ୍ଚାନ୍ତ ହେଉଛନ୍ତି । ତେଣୁ ଆଉ କିଛି ପ୍ରକୋଷ୍ଠ ନିର୍ମାଣ କରାଗଲେ ଓଡିଶାରୁ ଯାଉଥିବା କର୍କଟରୋଗୀମାନେ ଉପକୃତ ହୋଇପାରନ୍ତେ ବୋଲି ମତପ୍ରକାଶ ପାଉଛି ।  



ସମ୍ପାଦକ: ବ୍ରଜ କିଶୋର ମିଶ୍ର

©Tathya Media Pvt. Ltd. 2020